Sa Bibbia frorigiada

• #inlimba
• #Sardo
• #BibbiaFrorigiada

No ddu batallis e no ddu lisis a cussu

Apustis de tres diis chi Giacobbe si-ndi fiat andau cun sa cambarada cosa sua, a Làbanu dd’iant nau su chi fiat acontèssiu. E issu tzèrriat a is parentis e ddi currint infatu po seti diis paris. Tantu gei no est nudda! E imbatint a innui fiat firmu Giacobbe. Ma su contu de sa Bìbbia no fait mancai unu fueddu de Deus chi po sa prima borta andat anca est su sorgu, a s’Aràmeu, in d-unu bisu fatu a su noti e ddi narat: Castia-tì de no batallai a Giacobbe e de no ddi nai nudda ni de bellu ni de malu!

Custus fueddus parint un’oràculu: unu paru de fòrmula de fueddus chi narat totu e no narat nudda. Segundu comenti totu andant is cosas, balit in dònnia manera. Duncas, su Deus de Isacu chistionat finas cun s’Aràmeu! A nosu custu no si spantat meda, poita iat lassau fai puru a sa sorri, Rebeca, sa trassa de sa beneditzioni furada. Giai de innoi – e sa Bìbbia dd’at a fai cumprendi mellus in su contu de su disterru de Babilònia – custu Deus no est de unu pòpulu o de unu logu ebbia, ma de totus e de su mundu interu.

Est comenti e chi dd’essit nau a Làbanu: No mi stratallis a su piciocheddu, ca ddu tèngiu in coru! E no ti bèngiat a conca de ddu brigai tropu o de ddi nai ca at fatu beni: cussu at a essi doveri miu a su tempus suu. Fai-tì su fatu tuu, ca su contu miu gei ddu sciu deu. E comenti si fait a no ascurtai a chini nci arrennescit a intrai finas in su bisu e a ti nai su chi tenis in coru de fai? Giacobbe fiat ingunis asuta de tendas impari a totu su chi si-nci fiat portau avatu po si-nci fuiri. Su contu no ddu narat, ma no parit chi si scumponit tropu.

E sorgu, sena de ddi lassai tempus po nai o po s’amparai, cumentzat a ddi fai una bella sciacuada de conca: E poita ti-ndi ses fuiu comenti a unu stràngiu? Nci fiat bisòngiu de abetai chi andessi a tundi is brebeis po arretirai totu e ti-nd’andai? Ti parit cosa bella a essi pigau a fillas mias comenti a presoneras? Ti-ndi ses fuiu cua-cua, m’as collionau e no m’as nau nudda! (Iat a essi bella chi unu, po si-nci fuiri, depat nai su chi depit fai: no iat essi a si-nci fuiri! Ma su tziu, chi est fraitzu, depit circai de pesai sa chistioni po arribai a calicuna cosa de importu).

Chi m’iast nau chi ti-nci bolias andai, t’ia cuncordau una festa bella cun baddus, cantus e una bella pichetada. Invècias, as fatu totu a scusi e no apu tentu sa possibilidadi mancu de basai a fillas e nebodis. Nara-mì tui chi ti parit una faina bella. Est chi su Deus cosa tua m’at nau cosa, chi nou ti podiu fai finas una brulla mala. Ma sa cosa prus pretzisa est custa: comenti mai mi-nd’as furau is ìdolus cosa mia?

MAC

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Load More...