Sa Bibbia frorigiada

• #inlimba
• #Sardo
• #BibbiaFrorigiada

Chi m’agiudas, ti torru gràtzias

Candu Giacobbe si-ndi fiat fuiu de sa domu de su babu cun sa spera de si cojai cun d-una fèmina de sa famìllia sua, si fiat agatau in d-unu logu in su sartu e ddi tocàt a passai su noti. Duncas, circat unu logu po si corcai e circat una pedra po ddi fai a cabidali. No fiat de seguru sa manera prus bella po no tenni dolori de tzugu, ma a s’apretu, s’imperat finas una pedra po dormiri.

In prus, candu unu si-nc’est fuendi de sa morti, ddi tocat amarolla a s’arrangiai. Scurigau, si dormit. Si sciit chi candu unu est stracu o tenit pensamentus, su bisu no mancat mai. E, in tempus antigu, su bisu fiat puru su fueddu de Deus po s’òmini: candu unu dormit, no podit sceberai ita bisai, no si podit furriai a su fueddu de Deus, no si-nci podit fuiri. Duncas, su bisu fiat avisu.

E Giacobbe bisat una scala chi tenit is peis in terra e sa punta in celu; in cussa scala, fatu-fatu fait s’àrtzia e cala una cambarada manna de àngelus. Deus etotu, chi est ingunis afaci, ddi narat: Deu seu Deus! Cuddu Deus de babbu mannu Abramu, de babbu tuu Isacu. A tui e a s’eredeu tuu s’apu a donai custa terra innui ses corcau. As a tenni un’eredeu aici mannu chi nemus dd’at a podi contai, agiumai comenti a su prùini de sa terra. T’as a spainai de Orienti a Otzidenti, de su Cabu de giossu a su Cabu de susu de custa terra. E deu apu a essi cun tui e t’apu a amparai in dònnia logu a innui as andai. Apustis, t’apu a fai torrai a innoi, a custa terra etotu, poita deu no ti lassu solu e fatzu diaderus cussu chi promitu.

Comenti si ndi fiat scidau, Giacobbe narat: Custu est unu logu spantosu! Deus est innoi e deu no ddu sciia. Giacobbe si-ndi fiat assicau de cussa cosa manna chi iat bisau. Est unu logu de timmi diaderus! Est sa domu de Deus; est sa genna de su celu. Apustis iat sighiu a dormiri. A su mangianu chitzi, si-ndi fiat pesau, iat pigau cussa pedra chi iat imperau comenti a cabidali e ndi-dd’iat stantargiada.

Asusu dd’iat ghetau ollu e dd’iat mudau su nòmini de Luz a Domu de Deus. Sigomenti fiat fraitzu cun is òminis, dd’iat fatu cun Deus puru, fendi votu: Chi Deus m’agiudat in su caminu miu, chi m’acumpàngiat in dònnia faina, chi mi fait arricu e mi donat famìllia manna e mi fait torrai a custa terra, insaras at a essi Deus po mei. E chi Issu at a fai totu cussu chi m’at promìtiu, e m’at a sighiri a benedixi po totu sa vida mia e m’at a preni de dònnia gràtzias de Deus, dd’apu a donai – po Issu – una pimpiralla de totu su beni arriciu.

E su fraitzu otenit sa baneditzioni de Deus essendi mancari filibustieri finas cun Deus e faendi cuncàmbia de benis.

MAC

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Fainas de antigòriu (parte 21)

Load More...