Sa Bibbia frorigiada

• #inlimba
• #Sardo
• #BibbiaFrorigiada

E ita iat a essi!

Candu s’òmini tenit una punna in vida sua, no ddu firmat nemus. A bortas si narat chi funt pagus cussus chi tenint valori, fortza, determinu, poita funt pagus meda cussus chi tenint diaderus una tarea bella e crara. In beridadi, est massimamenti giustu a tenni calincuna cosa de circai de fai in sa vida e su caminu andant de sei.

Giacobe sciiat de si depi cojai e de si-nci depi fuiri de su fradi po unu pagheddu de tempus. In prus, comenti a dònnia piciocu de s’edadi sua, fiat circhendi fèmina po pesai famìllia e tenni fillus. Duncas, nudda ddu podiat straviai de su progetu cosa sua. Arribau a cussa mitza e a pustis de essi pregontau de su tziu, biit cussa pedra manna chi serràt sa buca de su putzu.

Comenti eus nau, cussa tella manna e grai no ddu fait timi po nudda e pregontat poita cussu putzu fiat ancora tupau, in ora manna de sa dii. E cuddus pastoris: No podeus fai nudda! Seus ebetendi a totus po ndi-dda tirai e fai bufai is pegus de su bestiàmini.  Ma nci fiat pròpiu abisòngiu de abetai a totus? E cussu Giacobe no fiat nàsciu po mudai is traditzionis?

No iat incumentzau sa vida sua agafendi su carroni de su fradi po nci-ddu fai arrui? Duncas, candu Giacobe biit a sa sorresta, nci-dd’àrtziat su sànguni a conca e ddi pigat s’apichìrriu de si fai biri forti e de valori. Insaras, s’acostat a su putzu e agafat sa pedra cun duas manus e ndi-dda pesat comenti e chi fessint duus pùinus de giarra.

Comenti si narat: Tirat prus su disìgiu de una fèmina chi no unu giuu de bois. E custu balit po dònnia cosa: candu unu tenit una cosa in conca, ita iat a essi una pedra manna! S’acostat a sa sorresta, dda basat cun totu sa passioni chi teniat in corpus e dd’iat stimada comenti e chi fessit s’ùnica fèmina de sa terra. Ma su bàsidu est sèmpiri a manu tenta cun su prantu: e Giacobe prangit a forti e contat is fainas suas a cussa picioca, chi no parat de ddu nai a su babbu e currit a lestru a domu sua.

Su prexu de essi agatau luegus sa domu de su tziu est mannu (tocat a arremonai chi no nci fiant mancu cartellus stradalis e tocàt a biagiai a pregontu). Làbano andat anca est issu e dd’imprassat e ddu basat, sciendi ca ddi fiat tzieddu de parti de mamma.

Sètziu in domu, Giacobe ddi contat totu sa vida sua e su poita nci-fiat andau de domu sua. E su tzieddu, ca fiat nàsciu e crèsciu margiani mannu, ddi narat: Gei ses pròpiu fillu de mamma tua e parenti miu etotu! Chi ddi fiat parta cosa bella, gei si-ndi iat a essi acatau luegus ita arratza de fraitzu fiat cussu Làbano. E su primu mesi nci fiat passau deretu.

MAC

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Fainas de antigòriu (parte 21)

Load More...