Sa Bibbia frorigiada

• #inlimba
• #Sardo
• #BibbiaFrorigiada

Su màndigu est paga saborida meda

Chi in s’àteru contu eus nau de is pobiddas de Giacobbe, in custu tocat a arremonai assumancu unu motivu poita is fillus ant tentu cussus nòminis. In italianu si narat s’etimologia, chi iat a essi s’arrèxini de su fueddu e poita si narat aici. Duncas, dònnia nòmini de is fillus tenit unu contixeddu po ndi spiegai ita bollit nai.

Ruben est su fillu de s’afinamentu tirau; Simeone tenit cussu nòmini poita Deus at ascurtau a Lia, chi fiat pagu stimada de su pobiddu; Levi est su fillu de tres chi at fatu apicigai Giacobbe a cussa pobidda; Giuda est su fillu de su gosu e de sa lodi a Deus. E Rachele ita depiat fai? Podiat abarrai a faci apari cun sa sorri sena de fillus? Comenti fiat acontèssiu a Sara, iat agatau sa manera de essi mamma issa puru: sa tzeraca sua iat pesau a cussu fillu chi no ddi nasciat in sinu: Dan, chi est stètiu sèmini e frutu de briga e de batalla cun sa sorri.

E sigomenti unu non bastàt, nd’at tentu finas un àteru, sèmpiri de sa tzeraca Bila, chi dd’at postu Nèftali, certu. Ma candu si cumentzat su certu, no est fàtzili meda a si firmai. Po cussu Lia pigat a sa tzeraca sua, Zilpa, e dda ponit in su letu de su pobiddu po ndi otenni un’àteru: Gad, bona sorti.

E issa puru, chi unu est pagu e duus funt medas, pigat a Zilpa e nci-dda torrat a ghetai me in is farrancas de su pobiddu e ndi-nascit Aser, su prexu mannu. Su contu de sa Bìbbia, chi cumprendeus totus siat fatu po donai a dònnia fillu unu logu in sa stòria de su pòpulu, sighit cun d-una stòria particulari.

Si narat (Gen 30,14-21) ca Lia no fiat prexada meda chi sa sorri puru iat agatau sa manera de essi mamma pro mori de sa tzeraca. E Giacobbe, po cussu, dda torràt a castiai cun stima. Duncas, in tempus de messai su trigu, su fillu mannu de Lia bessit a su sartu e torrat a domu cun su frutu de sa tomata burda.

Cussu frutu in s’antighidadi si naràt chi ammanniàt su disìgiu de s’òmini po sa fèmina. Ma fiat finas unu frutu saboriu. E Rachele, biendi ca su fillu de sa sorri ndi teniat meda, ddi pregontat: Nara-ddi a fillu tuu de mi-ndi donai! E sa sorri, pinnicosa e mesu scuartarada: Gei no t’at a parri pagu cosa ca mi-nd’as furau a pobiddu miu, ca imoi mi-ndi bolis pigai finas cussa fruta de importu! E sa sorrixedda, puntuda e pibinca: No ti unfris tropu. Chi ddu bolis a cussu, pigadi-nde-ddu notesta in su letu tuu e fai-ndi su chi ti praxit, ma dona-mì cussa prenda! Fatu beni e fatu beni meda.

A Giacobbe, ca iat collionau a su babbu e a su fradi cun cosa de papai, dd’ant bèndiu is pobiddas po cosa de papai etotu.

MAC

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Is ùrtimus fillus (parte 19)

Un’àteru certu (parte 20)

Fainas de antigòriu (parte 21)

Load More...