Sa Bibbia frorigiada

• #inlimba
• #Sardo
• #BibbiaFrorigiada

At bèndiu totu po su fàmini meda

Eus biu comenti est cumentzau su contu de s’arrùbiu, piludu e aresti Esaù, e de Giacobbe, su filibustieri abistu, nàsciu agafendi su carroni de su fradi. Giai de ciopeddu su segundu teniat unu naturali malignu, mentras s’àteru fiat comenti a unu sirboni aresti, cun pagu cerbeddu. Chi connosceis duus fillus a loba, mancari siant paris de artaria e longària o paris de faci, su naturali e sa manera de fai funt diferentis. 

Su nòmini de is duus piciocheddus narat giai su chi at essi sa vida insoru: Esaù, forti ma notzenti, cun su tzichìngiu de papai e no scroxiai mai unu pagu de famini. S’àteru, Giacobbe, margiani passientziosu chi abetat su momentu giustu po fai su torracontu suu.

E candu sa Bìbbia contat calincuna cosa no est sceti po sa moda de nai cosas antigas, ma po essi de imparu a chini ascurtat e ligit. Sigomenti a Isacu, su babbu, ddi praxiat meda sa petza de animalis cassaus, istimàt prus a su cassadori chi no a su fillu piticu, ca fiat sèmpiri asuta de is gunneddas de sa mamma. Fiat fraitzu, ma pagu masculinu.

Ma si sciit: ca su prus forti no timit nudda, e su prus abistu ddu collionat cun su sghinzu de mandiari o de feminas. Una dii, Esaù fiat torrendi de cassa e no iat cassau nudda, ma teniat unu famini po su strachìmini chi no bidiat mancu su caminu, comenti a is porcus candu abarrant una scurta chene papai. Mi ddu figuru: ghetendi su passu comenti a un’elefanti, castiendi-sì a ingìriu e apiotendi aintru de is strèxius po agatai cosa de papai, furriendi e scavulendi a terra is cobercus.

Arribau apalas de una crasuredda biit a su fradi murighendi una pingiada de terra cun d-una turra. E tui: ita stocada ses murighendi in cussu strexu? Giacobbe, ca no ddi fiat mòviu mancu unu pilu de conca e comenti a chini at parau su latzu, ddi narat: Cussu chi no as cassau tui oi, chi ses totu sa dii manna me in is tupas de monti e no as betiu nudda a domu!  E su fradi mannu: Ita ndi cumprendis tui de cassa, ca no ti sciis mancu cuai me in is tupas. Giai-mì a papai e mudu!  

E su margiani, cun sa faci arrisulana de su prexu, ddi narat: Ti-ndi bogu su fàmini cun custa gentilla arrùbia, chi mi lassas, imoi etotu, sa parti manna de sa sienda de babbu! E cuddu sirboni aresti, chi candu teniat sghinzu non cumprendiat prus nudda, ddi torrat: E a ita m’at a serbiri sa sienda de babbu cras, chi oi mi morru de fàmini? Pigati-nde-dda e gheta-mì a papai!

E spretziendi su beni de su babbu e ponendi sa manu in sa còscia de su fradi, po si ddu giurai, dd’iat lassau sa parti manna de s’eredidadi.

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Fainas de antigòriu (parte 21)

Load More...