Sa Bibbia frorigiada

• #inlimba
• #Sardo
• #BibbiaFrorigiada

Fradi tuu ti bolit bociri

Ita ti potzu donai a tui, chi apu giai prenu a fradi tuu? D’apu fatu meri tuu e me in is manus suas apu postu finas sa vida tua, cun dònnia gràtzia de Deus. Aici Isacu dd’iat nau a su fillu mannu, apustis de essi scobertu chi Giacobbe ddus iat collionaus a totu e is duus. Esaù non podiat parai e sighit a abetiai cun su babbu: Benedixi a mei puru! Calincuna cosa dd’as a ai arregorta po mei puru; o no?

E su babbu, prangendi a currùxinus po cussu chi fiat acontèssiu, ddi narat: Atesu de sa terra serenosa as abarrai e as a disigiai s’arrosu e s’àcua. As a bivi cumbatendi e batallendi po un’arrogu de pani e t’as a depi acuntentai de serbiri a fradi tuu. Ma candu as a tenni sa possibilidadi, as a segai su giuali chi t’at postu fradi e meri tuu.

Mancai tenessit custu isperu po su tempus benidori, cussu no fiat abarrau prexau de cussus fueddus e no podiat mancau essi assentau. Insanguitau de su feli, circàt in dònnia manera de ddi fai arrevesas e vengàntzias. Cussu margiani de fradi chi teniat fiat stètiu tropu sfaciu a ddi fai un’afrontu aici mannu.

Pensàt: Candu babbu at a serrai is ogus e eus a tenni su tempus de ddu prangi, no apu a abetai tropu a ddu bociri, mi-ndi torru a pigai su chi mi-nd’at furau. Ma forsis no ddu pensàt sceti in coru suu, ma ddu naràt a àtera genti cun arrennegu e infadu. Aici, dd’iant torrau a nai a sa mamma, Rebeca, chi si fiat afartada e iat tzerriau a su fillu piticu, cussu chi iat consillau po fai cussa faina cun su babbu a dannu de su fradi. Dd’iat nau: Fradi tuu, su mannu, est circhendi in dònnia manera de fai vengàntzia po cussu chi dd’as fatu.

No si-nd’at a stai finas a candu no t’at a bociri. Ascurta a mei: stèsia-tì de innoi e fui-ti-nci de pressi de fradi tuu. Piga su caminu po andai de Labano, fradi miu e tzieddu cosa tua: t’at a sciri arriciri comenti a unu fillu. Abarra ingunis po unu pagheddu de tempus, finas a candu no dd’adessi studau s’arrennegu chi tenit in corpus Esaù, po cussu chi dd’as fatu.

Scarèsciu chi si-ndi siat, t’apu a fai tzerriai de calincunu – chi apu a essi ancora bia – e tui as a podi torrai a innoi.  E torrendi a arripiti su chi iat nau candu si fiat intèndia mali cun cussus duus pipius in brenti, ddi narat: poita depu sunfriri po sa morti de unu de bosàterus? At a essi prus lègia cussa morti, poita fata po manu de unu fillu miu etotu.

Gei apu a fueddai deu cun babbu tuu e at a essi issu etotu chi ti-nci at a mandai anca est tzieddu. T’arracumandu de fai atentzioni a ti circai a una fèmina bella e chi siat de s’eredeu nostu. Gei ti dd’at a nai babbu tuu puru.

MAC

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Fainas de antigòriu (parte 21)

Load More...