Sa Bibbia frorigiada

• #inlimba
• #Sardo
• #BibbiaFrorigiada

Cun su tziu… de seti in seti

Sa befa fiat ingunis, acanta de sa genna de Giacobe. Su tziu fiat prontu a ddi serbiri su mandiari marigosu de s’improsu, po ddi fai incumentzai a provai ita boliat nai a collionai a is àterus. Làbano tzerriat a is òminis de sa bidda sua e cuncordat sa coja de sa filla cun cussu parenti suu, apustis de seti annus de traballu. Aici iant cuntratau e aici si depiat fai.

Chini donat su fueddu, fait sighiri sa faina a sa promissa. Duncas, comenti si faiat insaras (e oi puru in calincuna cultura, finas in cussa ebràica!), is òminis papànt e bufànt cun su sposu e is fèminas cun sa sposa. Cussa festa podiat sighiri po una cida o po unu merii. In su momentu prus de importu de sa festa, su sposu e sa sposa si-nci depiant arretirai a un’aposentu cuau po fai su doveri de is cojaus. Duncas, si-nci inserrant in s’aposentu de corcai e ddoi abarrant totu sa noti. Ma cussu fraitzu de tziu ddi fait una brulla bella: no ddi betit sa fillixedda pitica chi cussu stimàt, ma sa prus manna, sa prima, Lia.

Su babbu dd’iat donada finas a una tzeraca, Tzilpa, po dda serbiri in su tempus benidori. A mangianu, Giacobe si ndi fiat acatau chi iat corcau cun Lia e no cun Rachele. Gei fiant stracus, forsis puru bufaus, ma a no si-ndi acatai nudda-nudda parit agiumai faula! Assumancus unu fueddu gei dd’at ai bogau in totu sa noti! O no? O unu fueddu de stima, de prexu o de muina!

E corchendi cun issa, no si-ndi podiat acatai? E dd’eus connotu fraitzu e befianu! Ma su chi narat sa Bìbbia no bolit essi mai contu a sa sèria de cussu chi est accontèssiu. Sa Bìbbia si narat su chi si podit agiudai a cumprendi, a bivi, a arraxonai in contu de su chi seus e de su chi pensaus chi siat Deus. E sa vida de cussus babbus mannus no est de genti santica; ma est vida prena cun bellesas e prantus, cun passus a innantis e asegus!

E Giacobe, chi iat improsau a su babbu tzurpu, est stètiu collionau in su scuriu de sa noti. Cussu chi nd’iat furau su essi primu fillu cun cudda gentilla arrùbia, est collionau apustis de una papada pighendi a sa sorresta manna. Isacu si-ndi fiat acatau de sa faina de Giacobe a pustis de dd’essi beneitu e Giacobe si-ndi acatat sceti a mangianu.

Is antigus podiant nai: a pratu torrau! Su mangianu betit sa luxi e a Giacobe su sentidu. Cussu tziu ge si dd’iat pagau su traballu, ma a manera sua! E cussu si dd’iat nau a su tempus giustu: Gei ses fillu de mamma tua e deu seu tzieddu tuu! Ma Giacobe, chi teniat sanguni callenti, si chèsciat cun su tziu e ddu batallat: Ita m’as fatu! No apu traballau po cussa bellixedda? Poita m’as collionau?

MAC

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Fainas de antigòriu (parte 21)

Load More...