Sa Bibbia frorigiada

• #inlimba
• #Sardo
• #BibbiaFrorigiada

Cun linna arba contras a su tziu

Stallau chi nd’iat su tallu suu cun pegus pintus, nieddus o amanciaus de cussu de su tziu, iat fatu segundu una faina antiga chi oi, forsis, no nci arrennesceus mancu a cumprendi. Dònnia borta chi brebeis o crabas andànt in calori, Giacobbe cuncordàt truncus de linna sperraus in mesu e ddus sterriat in terra.

Candu unu crabu o unu mascu fiant in su momentu de sa currimenta, Giacobbe ddus poniat a faci de cussus. Is matas chi sceberàt po cussa faina fiant mendula, plàtanu e linnarbu. Si cumprendit ca totu e tres funt matas de linna arba e crara e forsis est custu su motivu de cussa faina. In sa lìngua ebràica su nòmini de su tziu de Giacobbe, chi dd’at collionau una pariga de bortas e de su chi si-ndi-est stèsiau, Làbanu, bolit nai pròpiu arbu. Duncas su chi si contat chi fait Giacobbe est una spètzia de brulla chi pertocat a su tziu etotu.

A issu dd’at lassau is pegus arbus, poita de cussus ndi ddoi at de prus chi no cussus amanciaus, nieddus e pintus. Invècias, cun d-una bribba de sabori antigu mudat su chi est arbu in s’imbressi: sa richesa de su tziu passat a issu, su crarori de Làbanu de essi su meri andat in manu a su nebodi, sa malesa chi eus connotu de cussu fraitzu est prus manna in su fillu de sa sorri, Rebeca. Insaras, su scritu no s’est contendi sceti calincuna cosa chi no cumprendeus prus – cun truncus de linna sperraus e fainas stravanadas – ma s’est amo stendi comenti si mudat sa parti de su pòberu.

Eus a podi nai ca s’arroda girat e sa richesa impòberat po chi pensat de fai cussu chi bolit contras a is àterus. Tzertu, ca custus contus funt scritus de chini s’est postu a s’ala de Giacobbe e no de su tziu e, duncas, contant su mori de Làbanu.

E po fai a cumprendi ancoras mellus chi totu cussa imbusteria fata contras a su tziu e a su beni suu fiat giusta, narat sa Bìbbia chi dònnia borta chi is pegus fiant fortis ddus poniat in su tallu suu e candu cussus fiant debileddus e lenus nci ddus sceddàt de su suu po ddus ghetai a cussu de su tziu. Duncas, is pegus de issu sighiant sèmpiri de prus a essi fortis e amueddaus.

A pustis de una pariga de librus e de medas contus, Anna, sa mamma de su profeta Samueli – chi no nci arrennesciat a tenni fillus e de issa si nd’arriiat s’atera pobidda de Èlkana – narat in su cantu chi dd’ant postu in buca: Deus fait morri e fait bivi, fait calai in digràtzia e torrai a artziai. Deus torrat a pòberus e a arricus, t’abasciat e ti-ndi-pesat. No tocat a scaresci ca sa Bìbbia contat stòrias de genti chi teniat sanguni e petza e no pregadorias devotas de àngelus!

MAC

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Load More...