• #inlimba
• #Sardo
• #Imprentas

Gaza. S’Unicef at contau prus de cincuantamilla pipius mortus o ingortus de su 2023

In prus pagu de setantaduas oras, in s’acabu de cida passada, eus pòtziu biri cussus bìdeus de destrossa manna innui si funt bius is pipius morendi in cussa chi connosceus comenti a sa Tira de Gaza: unu mucadori longu de terra chi praxit a medas e de sèculus. Cussa terra est su portu in su Mediterràneu po totu is pòpulus de s’orienti.

Giai babilonesus, sumerus, assirus, hititas teniant interessu mannu asusu de cussa terra prana e afaciada a su Mari Mannu. In prus in cussa terra passàt s’Arruga de Mari chi poniat in relata s’Egitu cun su mundu. Is romanus iant afortiau meda cussa arruga ponendi sordaus po su controllu e faendi pagai po passai in cussu logu siguru.

Oi cussa terra est ancora de interessu po totus, finas a s’àtera parti de su mundu. Is fueddus de su presidenti Trump, chi at nau de nci bolli bogai cussa genti chi ddoi bivit po fai logu de spàssiu e de pàsiu po is arricus americanus e de totu su mundu, faint atzutzuddai is pilus e provai bregùngia manna.

A s’acabu de maju, s’Unicef at contau chi funt prus de cincuantamilla is pipiu chi funt o mortus o ingortus po is bombardamentus in cussa terra. Cincuantamilla! No seus fueddendi du un’incidenti intra de duas corrieras, chi at a essi unu dannu mannu cussu puru. Ma de cincuantamilla piciocheddus chi, sena de motivu perunu, funt paghendi sa malesa de genti sena de coru.

Tocat a ddu nai: no est gherra, ma est unu mortòrgiu sena de conca e sena de motivu prus. In Aristanis su sèighi de maju passau unu muntoni mannu de genti s’est agatada in praza de Lionora e at fatu sciri sa voluntadi de cundennai cussu mortòrgiu. No est possibili a fai finta de nudda o a si cuai in custu mali.

Comenti si podit castiai su telegiornali sena de intendi su coru stringendi-sì, biendi cussa genti chi currit po pigai unu pagheddu de cosa de papai e benit sparada? O biri chi is càmbius de cosa de papai no podint intrai a ndi donai a totus su chi tenint bisòngiu? O biri s’ambulanza chi benit sparada poita si pensat chi aìnturu ddoi siant terrorristas?

Sa timoria prus manna est chi su chi acontessit ddu biit totu su mundu e nemus fait o podit fai nudda. At a essi malu meda chi fiat acontessendi sena chi nemus ddu scipiessit. Duncas, su valori de cussas vidas cali est? Su valori de mannus e pipius chi funt morrendi de fàmini o chi funt bivendi impari a sa morti de chini tenint acanta e de totu cussu chi ant pesau me in is annus passaus? De cussas manifestatzionis tocat a ndi fai àteras e a fai cumprendi chi no funt contras a calincunu, ma po su beni de totus. Cussa gherra bolit acabada, poita no est mancu gherra.

In gherra funt duus chi batallant, innoi e imoi no est gherra. Su chi est acontèssiu su seti de ladàmini de su duamillaebintitrès est stètiu una faina mala meda. E totu su mundu dd’at arreconnotu. Ma tocat a nai chi imoi puru si funt faendi cosas malas meda. Calincunu at pediu de apicai unu lentzolu arbu a is fentanas.

Genti meda dd’at fatu, ma deu m’abetau chi no ddoi fessit domu sena de cussu lentzolu. De innoi, de su giornali de sa diòtzesi, ddu pedeus ancora: apicaus lentzolus, poita totus passendi depint arregordai cussu dannu mannu in sa terra de Gesu Cristu, chi at sarvau su mundu donendi sa vida sua e no pinnichendidda a innotzentis.

Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22

A cura di Michele Antonio Corona

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Load More...