• #inlimba
• #Sardo
• #Imprentas

Is apuntamentos chi nos ant a acumpangiare in custu istadiale 

Acabbada, domìnigu passadu, s’editzione 2025 de su fèstival Licanias de Neoneli, chi at acasagiadu fintzas sa presentada de su libru Deo so innotzente (De Agostini, 2024) iscritu dae Màuru Trogu e Beniaminu Zuncheddu, s’istadiale apenas cumentzadu si presentat ricu meda de addòbios culturales e ispetàculos in sa diòtzesi nostra. Su tema chi amus seberadu ocannu fiat su de sa Libertade, narat Salvatore Cau, sìndigu de sa bidda in su coro de su Barigadu e consigieri regionale. Semus presados meda de sa resessida bona de sa de noe editziones de su fèstival, chi presentaiat unu calendàriu ricu meda de addòbios de literadura, mùsica, artes visivas, passigiadas pro mannos e minores.

Sighit fintzas su programma de su Fèstival de s’Archeologia 2025 cuncordadu dae sa Fundatzione Mont’’e Prama de Crabas. Sàbadu 28 e domìnigu 29 de làmpadas, in su logu archeològicu de Tharros, in su Sinis, ddoe at a èssere unu de is apuntamentos de mùsica prus abetados, est a nàrrere su cuntzertu de Andrea Morricone intituladu Morricone ghiat a Morricone, cun s’orchestra Roma Sinfonietta chi at a sonare is colunnas sonoras de Ennio Morricone pro su tzìnema. A is cuntzertos ddoe at a pigare parte fintzas su Coru G.P. da Palestrina de Crabas. Àteros informos s’agatant in s’indiritzu www.monteprama.it/estate-di-monte-prama/festival-archeologia-2025

Arriora puru tenet unu programma bellu de cuntzertos pro custu istadiale bascosu. Si cumentzat chenàbura 1 de austu in su Parcu de is Sonos, in Su Cùcuru Mannu, cun su cuntzertu de Cristiano De André intituladu De André cantat a De André Best of Tour 2025, in ue su fìgiu de su grandu candadore-poeta genovesu at a cantare is cantzones prus nòdidas de su babbu. Ma Arriora acasàgiat fintzas un’apuntamentu de su Dromos Fèstival, martis 5 de austu, in Sa Marigosa, cun Elena Ledda, Mauro Palmas, Cuncordu e Tenore de Orosei, Luigi Lai, Marino De Rosas e is Àrgia. Totu is àteros apuntamentos de su Dromos Fèstival 2025 s’agatant in s’indiritzu www.dromosfestival.it/programma

Dae su 29 de austu a su 7 de cabudanni Sèneghe acasàgiat sa de 21 editziones de su Cabudanne de sos Poetas. Su tìtulu de sa manifestatzione de ocannu, chi at giai connotu unas cantas anteprimas, est Tramudos, cun riferimentu a su cùrrere de su tempus chi mudat is sotziedades nostras e a su bisòngiu, semper prus apretosu, de abarrare umanos. E, cun is gherras chi nos sunt turmentende a pagu tretu dae domo nostra, su tema paret bastante intzertadu! Su Cabudanne de su 2025 at a acasagiare a prus de 70 òspites, intra de poetas, iscritores, intelletuales, artistas. No at a istentare a essire su programma prus a fine de custa manifestatzione, chi s’at a pòdere lèghere in s’indiritzu www.settembredeipoeti.it

Dae su 26 de trìulas a su 7 de cabudanni in Samugheo ddoe faghent sa de 58 editziones de Tessìngiu, sa mustra de s’artesania artìstica de Sardigna chi, ocannu puru, dd’ant a cuncordare in sa Cantina sotziale betza. Una faina programmada dae s’Amministratzione comunale ghiada dae Balisio Patta, a manos de pare cun su MURATS, su Museu Ùnicu Regionale de s’Arte sarda de su Tessìngiu. Pro ocannu puru s’abetat de bìere unu frùmene de bisitadores chi, a prus de is produsimentos de s’artesania, ant a pòdere sighire una filera longa de addòbios culturales e mustras, tastende fintzas is màndigos bonos e su binu de custa bidda de Mandrolisai. Àteros informos s’agatant in sa pàgina de su MURATS in s’indiritzu www.murats.it e in sa pàgina istitutzionale de su Comune de Samugheo: www.comune.samugheo.or.it/it 

In fines, in Aristanis, s’Amministratzione comunale est cuncordende su programma pro su Cabudanni Aristanesu, chi nos at a acumpangiare in sa coa de s’istadiale cara a s’atòngiu.

A totu custu si ddoe agiunghent is festas e is sagras chi, gràtzias a Deus, no mancant agiomai in dònnia bidda e àteras manifestatziones de importu comente a sa Sartilliedda de istadiale, cuncordada dae sa Pro Loco de Aristanis in Turre Manna (in austu) o sa Regata de is Fassonis de Santa Justa (semper in austu) o sa Currera de is iscurtzos de Crabas, chi ocannu s’at a fàghere su 6 e su 7 de cabudanni. Ma regordamus fintzas s’oferta culturale de is museos de su territòriu, dae su Museu de is Gigantes de Crabas a sa Domo anca est nàschidu Antoni Gramsci de Ilartzi, dae s’Antiquarium Arborensu e dae su Museu Diotzesanu de Aristanis a su Menhir Museum de Làconi, dae su MAMA de Atzara a su Museu de is Cadditos de sa Jara de Geroni, a su MARATE de Ìsili o a is museos de Aritzo. 

Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22

A cura di Antoni Nàtziu Garau

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Load More...