• #inlimba
• #Sardo
• #Imprentas

Cala Gonone. Unu logu de spantu e de ideas bellas de pigai a modellu 

Candu si pigat sa moda de girai in Sardìnnia, si biint unu muntoni mannu de cosas bellas. Prus si girat e prus si càstiat e prus si biint fainas de spantu e de bellesa. Medas bortas si biint finas cosas malas, ma no est su chi apu biu in Cala Gonone in d-una pariga de diis a s’acabu de làmpadas.

1. Est mai possìbili a firmai sa màchina sena de pagai? Si podit forsis firmai sa màchina acanta de mari de badas? Ingunis (Durgali e Orosei) si podit. E si podit in dònnia mari, in dònnia costa, in dònnia logu. Ant a essi scimprus de no guadangiai nudda nudda? No creu… sa genti si tirat finas in cussa manera.
2. In d-unu tretu de duxentus chilòmetrus cuadraus apu contau assumancus tres logus po giogai is pipius, cun lissinadòrgius de pràstica, cun sàntzia-sàntzia, cun pèrtias po artziai, cun àterus ordìngius po spàssiu. Totu de badas e in logus beni tentus. Erbixedda birdi, matixeddas artas, setzidòrgius e mitzas de àcua.
3. Su domìnigu mi seu spantau chi ddoi fiant – finas su domìnigu – piciocus limpiendi is arrugas cun scovas. Boghendi totus su chi calat de is matas de opinu, po tenni su logu lìmpiu e bellu.
4. In dònnia praja apu agatau – s’at a parri spantu mannu – unu fusti longu in mesu a cuatru bòtulus de àliga: unu po sa pràstica, unu po su birdu, unu po su sicu e unu po s’ùmidu. E sa genti ddu seberàt beni? No ddu sciu, ma ddoi fiat!
5. In prus, in s’arruga chi passat acanta de mari – innui ddoi funt medas logus po papai – ddoi funt unu muntoni mannu de bòtulus de àliga chi ddus sbùidant assumancus duas o tres bortas a sa dii. Sa genti ghetat ampuddas de birra e imboddicàmini de gelau? Eja. E ddus sbùidant dònnia dii sena de contraventzioni peruna. S’àliga po is domus passat dònnia dii.
6. In prus, ancoras, in Cala Gonone est abertu su logu po nci portai a totu dii, ses diis asuba de seti, s’àliga chi no passat innantis de partiri. Unu servìtziu bellu chi permitit a totus de no lassai in domu àliga peruna e chi òbrigat a no ghetai a spàinu in d-unu logu chi siat. Chi no bastat, in medas prajas ddoi est una domixedda cun arrodas chi s’aberint e si serrant po dònnia calidadi de arrefudu. Si sèberat s’àliga a sa bessida de sa praja.
7. Ingunis, unu no si chèsciat ca in sa firmada de is màchinas ddoi funt tropus campers, poita ddoi funt medas logus innui cussus mezus si podint firmai cun trancuillidadi e sulenu. Bastat a fai is cosas in gràtzia de Deus e nemus si depit chèsciai.
8. Su pipiu no sciit comenti sbentiai? Ddoi funt, in mesu de is matas de opinu, giogus po mannus e piticus? Ti praxit a fai su crabaxu in monti? Ddu podis fai finas in sa costera, cun acàpius in su chintzu e cordas me in is palas.
9. S’at a podi bufai s’àcua sena de andai a butega? Sissi! Ddoi funt logus chi unu podit andai a pigai àcua frisca cun bubulicas e sena, paghendi pagu centèsimus a litru, cun s’ampudda cosa sua. Po chini est batalladori contras a sa pràstica est giustu e po chini bolit sparanniai.
10. E si parit pagu a tenni unu portu innui prus de centu barcas si podint firmai a de noti e a de dii podint bessiri po noranta diis a s’annu?

Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22

A cura di Michele Antonio Corona

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Load More...