• #inlimba
• #Sardo
• #Imprentas

CEI. Is pìscamus ant scritu a su Guvernu po amelliorai sa vida e su traballu

Is pìscamus de Itàlia ant scritu una lìtera a su Guvernu italianu po tenni in cunsideru prus mannu sa realidadi de is biddas e de totus is logus de làcana. Cun is detèrminas econòmicas e tecnològicas, chi ponint unu muntoni mannu de dinai po avalorai e amelliorai is tzitadis, is biddas e is regionis prus pòberas si funt impoberendi sèmpiri de prus e sa gioventudi est obrigada a si-nci depit fuiri.

Duncas, is pìscamus pregontant chi si pòngiat dinai e ideas po permiti a giòvanus, a bècius e a famìllias de bivi una vida bella e prus sulena, comenti si podit fai me in is biddas e in logu de sartu. A pustis de s’atòbiu de dònnia annu (de su 2021 a oi) chi ant fatu in Beneventu po fueddai de is zonas chi funt atesu de sa costera e chi parint prus pagu punna de turistas e de is cumbenièntzias de sa genti, is pìscamus scriint a su Guvernu e a su Parlamentu po nai chi no tocat a pensai a cussa situatzioni delicada comenti a unu chi est acumpangendi unu màrturu suferenti a sa morti.

Cussa manera de parai fronti a su problema serbit sceti a fai prus a lestru chi arribit sa morti. A foras de cobertàntzia, su màrturu funt is zonas de aintru e su mali malu chi est arribau est su spopolamentu. Is pìscamus crìticant sa punna nùmeru 4 de su Pranu stratègicu natzionali po cussus logus chi prevedit acumpangiamentu in d-unu caminu de spospolamentu sena de torrada (Accompagnamento in un percorso di spopolamento irreversibile).

Is pìscamus decrarant de depi chistionai mellus de biddas e de logus piticus e cun pagu genti, circhendi de avalorai sa manera de bivi, s’ària chi s’arrespirat, sa sulendidadi e sa comunidadi chi in d-una bidda est ativa e fait fainas po totus. In prus, ant scritu chi si provit a torrai a movi su traballu de sa terra e de is artis chi ddoi funt in cussus logus.

E, si est poita ddoi funt pagus giòvanus prontus a traballai, is pìscamus oferint s’idea de totus cussus chi arribant de àteras natzionis in circa de traballu e in circa de una domu. Is disterraus de àterus Stadus chi arribant a Itàlia podint essi una possibilidadi bella po sighiri a fai bivi is biddas nostas cun arrespetu e possibilidadi de fai bivi ancora cussas realidadis.

Po no chistionai sceti a foras, ma ponendi pregontas finas a sa Crèsia, is pìscamus ant allegau puru de is detèrminas de Paba Franciscu de ponni a pari diòtzesis acanta, de bogai pìscamus. Sa presèntzia de unu pìscamu in d-una terra podit essi su sinnali de vida, de movimentu, de atentu, de ufitzialidadi.

Duncas, si pregontat de furriai cussa moda de is ùrtimus dexi annus, po torrai a ponni unu pìscamu in dònnia diòtzesi, ancora de prus in cussas piticheddas e in zonas de scarescidura de su Stadu. Chi sa Crèsia puru si-ndi scarescit sa realidadi de is biddas e de is pòberus, punnendi totu a is tzitadis o a is logus de importu, a cussa genti scarèscia ddi tocat a tramudai a tzitadi, lassendi sèmpiri prus biddas buidas.

Duncas, una lìtera chi no est stètia pubritzidada meda de sa televisioni, poita fait furriai sa moda chi su piticu depat essi papau de su mannu. Pròpriu comenti est acontessendi cun is butegas, cun is fainas pùbricas, cun is siendas.

Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22

A cura di Michele Antonio Corona

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Load More...