• #inlimba
• #Sardo
• #Imprentas
• #MicheleAntonioCorona

Federconsumatori. Bòtulus sèmpiri prus piticus, ma is prètzius àrtziant etotu

S’assotziu chi amparat, ghiat e custodit sa buciaca de is personis chi còmporant, sa Federconsumatori, at presentau unu stùdiu de is ùrtimus annus in Itàlia. In custa ùrtima cida nd’ant chistionau in trasmissionis e giornalis meda. Sa primu cosa de nai est chi is prètzius de su 2021 a oi funt crèscius de su 40 % asusu de is cosas chi comporaus de prus.

Duncas, sa buciaca prangit prus oi de cuatru annus a oi e, ancoras de prus, de candu est intrau s’èuru. Difatis, in generali de su 2001 a oi is prètzius de totu funt assumancus addopiaus: si pagat in prus de su 100 %. Ma po nai custu, forsis, no ddoi fiat bisòngiu de unu stùdiu mannu, poita nosu etotu si-nd’acataus dònnia dii chi sa cosa est sèmpriri prus cara.

Ma tra is cosas de ponni in cunsideru est chi de una pariga de annus a oi, apustis de cussa pesta chi est stètia sa Covid 19, is bòtulus de is lissias, is imboddicàminis de calincunu màndigu, is ampuddas de calincuna calidadi de cosa de bufai si funt impiticaus. Cun sa scusa de essi prus lèbius po sa genti bècia, po no fai dannu a su clima, po no produsi tropu pràstica, s’idea est sa de impiticai in cunfetzionis.

E unu podit nai chi est cosa bella meda. Po no parri una collionadura po chini còmporat, ant donau a custa faina de impiticai is imboddicàminis unu nòmini ingresu: Shrinflation. Comenti chi, batiendi-dda in ingresu, siat una cosa bona e disigiada de is comporadoris. Su malu est chi su prètziu, candu no est finas ammanniau, est abarrau aguali a candu su bòtulu fiat prus mannu.

Su stùdiu at ghetau s’ogu asusu de lissias e de sabonis. Imoi, po limpiai dònnia cosa ddoi est su prodotu cosa sua e arguai de no ddu connosci o no dd’imperai! Totus si-ndi seus acataus chi is butegas de lissias e de saboni funt crescendi meda e si nd’agatant una o duas de dònnia calidadi me in is tzitadis comenti a Aristanis e finas in biddixeddas prus piticas.

Ma su chi m’at spantau de prus de su stùdiu funt is gelaus. No is carapignas fatas a manu, ma cussus gelaus in cunfetzioni o in bustixeddas de pràstica o in bòtulu mannu. Su chi faint is gelaterias artesanalis est crèsciu de su 9 % in is ùrtimus tres mesis. Ma cussu fatu in siendas est crèsciu de su 2021 a oi de su 42 %.

Duncas unu gelau chi costàt 1 èuru ndi costàt 1,42 e unu chi ndi costàt duus èurus imoi est 2,84 e diaici sighendi a cresci. E de su 2001 a oi est crèsciu de su 138 %. Cussus cun su matzucheddu de linna de su 24 % in is ùrtimus annus, invècias cussus a bòtulu mannu de pigai a cullera de su 23 %.

Ma finas po su gelau ant fatu passai sa moda de su fueddu ingresu chi eus nau: su gelau s’impiticàt e su prètziu est crèsciu. E chi su disìgiu de gelau, finas a pagus annus a oi, fiat in su tempus de istadiali e pariat cosa stravanada a ddu circai in tempus fridu, oindii, invècias, me in is butegas mannas si podint agatai sèmpiri in cussus bancus de is cosas fridas e finas is butegas de gelau artesanali serrant sceti – candu serrant – de su mesi de idas finas a friàrgiu. Duncas, tempus po mudai is prètzius ndi tenint totu s’annu.

Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22

A cura di Michele Antonio Corona

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Load More...