Sa Bibbia frorigiada

• #inlimba
• #Sardo
• #BibbiaFrorigiada

Favoressit sa vengàntzia

Su chi si contat in su capìtulu trintacuatru de su libru de sa Gènesi, fait atzutzuddai is pilus. No est chi siat s’ùnicu contu chi fait timi o pensai in sa Bìbbia, ma de seguru est unu de is prus mannus in contu de violèntzia, de morti, de malvagidadi. Ma tocat a si pregontai puru chi su contu tenit sa punna de fai timi o de fai pensai, de bogai su fueddu a chini ligit o ddi fai cumprendi calincuna cosa.

Dd’eus nau giai bortas medas: is contus de sa Bìbbia serbint a su ligidori po cumprendi su mundu suu, cussu innui bivit, camminat e morit. Candu unu nci biit pagu, si ponit is ullieras, chi no ddi faint biri un’àteru mundu, ma si ddu faint biri mellus, prus craru. Sa Bìbbia contat po amostai, narat po fai a cumprendi, arremonat cosas antigas po chistionai de cussas de oi.

E cantu si-ndi intendint de contus de violèntzia contras a fèminas, de mortòrgius intra de fradis o bixinus, de suferèntzias mannas contras a giòvanus e piciocheddus. Cussu bixinu sena de Deus, chi fiat su fillu de Sichem, iat pèrdiu sa conca po una filla de Giacobbe: Dina. Giai su nòmini bolit nai Su giudìtziu de Deus, duncas est unu nòmini de importu mannu.

In prus, su chi fait Sichem est a dda improsai, lisiai e losingai, finas a candu no at fatu su dannu mannu de ndi-ddi pigai s’onori. Custa espressada no est giusta giusta, poita est issu chi at pèrdiu s’onori cun su chi at fatu e no Dina. Oi custu tocat a dd’arremonai sèmpiri e sèmpiri de prus.

Chi in tempus passau, comenti narat sa Bìbbia innoi e in àterus contus, pariat chi fut sa fèmina chi perdiat calincuna cosa, oi est de doveri a nai chi est su malu chi nci perdit, chi at giai pèrdiu, chi amostat comenti est pedrosu su coru suu. Ma Sichem, apustis de ai fatu su dannu, ddu bolit arrangiai paghendi su dèpidu: pregontat a su babbu de fai su paralìmpiu po cojai a Dina.

Dònnia cosa però teniat unu prètziu, duncas totu si podit comporai o cun dinai o cun àteru. No est su babbu mannu, Giacobbe, chi decidit su prètziu, ma su coru arrennegosu de is fillus.

No boleus dinai, ma chi siast comenti a nosu, tui e totu sa cambarada tua. Segai-si-ndi su scrapuddu de sa natura chi portaus nosu mascus. Faei comenti a nosu e eus a essi fradis. Sceti insaras Dina podit essi pobidda de Sichem! E cuddus, no cumprendendi sa traitoria manna de cussus giòvanus, ddu faint. E chi su pipiu sanat luegus candu ndi-ddi segant su scrapuddu, su mannu no. Ancoras dèbilis e suferentis, is fradis de Dina ddus bocint a totus: una vengàntzia manna. Unu contu chi bolit lìgiu impari a su chi at a acontessi a Tamar cun su fradi germanu Amnon (2Sam 13).

MAC

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Load More...