Sa Bibbia frorigiada

• #inlimba
• #Sardo
• #BibbiaFrorigiada
• #Imprentas

Totu sa stòria a fundu assusu 

Imoi chi s’at nau ca est Giusepi, s’at a batallai po su chi eus fatu! Diaci ant a ai pensau is fradis, apustis de totu su chi ddis at fatu cun cussus sacus e su dinai cuau e apustis cun su càlixi arresurtau po ponni in presoni a Beniaminu. Ant a ai tìmiu meda.

E ddis depit essi torrau a conca ca dd’iant bèndiu e, cun su babbu insoru, dd’iant fatu passai comenti a mortu. Giai fiat fengiosu a piciocheddu, ita at a essi imoi? E issu: Acostai-sì a mei, fradis mius! De candu seu arribau a innoi, in Egitu, apu pensau meda a totu e a totus. Su pensamentu est stètiu malu meda po su chi m’est acontèssiu e finas po su chi apu fatu deu in domu, contras a bosàterus e contras a babbu. Pensau de essi su prus mannu e po cumprendi seu dèpiu abasciai finas a custa terra de scuriu. Seu arribau tzeracu e imoi seu meri. M’iant fatu artziai a essi su primu de is tzeracus e mi-nci ant ghetau a presoni. M’at tzerriau su faraoni po ddi sboddiai is bisus e su chi no nci seu arrennèsciu a fai a piciocu dd’apu fatu a mannu.

E is fradis fiant ancoras prus spantaus de is fueddus sulenus chi teniat cussu fradi traìxiu. In prus – sighit Giusepi – ia pensau de si-nci ghetai a totus a galera, po si-dda fai pagai po cussu chi m’eis fatu; ma de candu apu biu a Beniaminu, fillu de mamma mia etotu, parit ca Deus m’at pregontau de cumprendi su signìficu no de unu bisu, ma de sa vida mia etotu. Ca medas bortas est fàtzili meda a cumprendi unu bisu, ma est prus pagu fàtzili a cumprendi sa vida, pruschetotu candu est de suferèntzia e de dolu.

Setzendi-sì acanta de is fradis ddis narat: De candu seis arribaus a innoi, sa tristura manna chi tenia s’est mudada a bellu a bellu in serenidadi, poita apu cumprèndiu ca no seu arribau a Egitu sena de unu progetu de Deus. Intamis de essi sa malesa de bosàterus a m’essi mandau a innoi, est Deus chi at imperau cussa detèrmina mala chi eis tentu po cuncordai sa vida a bosàterus, a babbu e a totu sa famìllia nosta. Chi deu no fessi arribau a innoi, e chini s’iat a ai stugiau trigu e benis po campai ancoras po annus meda? Deus no bolit su mali, ma mancu ddu timit. Sciit e s’imparat a ddoi passai in mesu po ddu mudai, po-ndi fai bessiri su mellus de nosu etotu. Po duas bortas seu arrutu in d-una tofa funguda e niedda e po duas bortas Deus mi-nd’at fatu torrai a bessiri. Duncas deu puru si fatzu bessiri de cussa timoria de morri.

Mancu berus ddis est partu a cuddus, mancai calincuna duda fiat abarrada chi fessit un’àtera brulla de cussu fradi chi sciiat comenti cumandai fadendi-sì bonixeddu.

MAC

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Load More...