Sa Bibbia frorigiada

• #inlimba
• #Sardo
• #BibbiaFrorigiada
• #Imprentas

No bollu morri cun cussu dolori

Ddis iat nau de torrai a domu insoru, a domu de su babbu, e de pigai a su fradi piticu, po avalorai is fueddus insoru. Sena de cussa prova, no ddus iat a ai crètius. Totu est fàula, poita Giusepi ddus iat connotus, ma tocat a fai scola a issu e a cuddus fradis chi depint cumprendi su chi est acontèssiu a sa vida insoru e a su fradi chi ant bèndiu, e chi no sciint siat ananti de cuddus.

A su cumandu de su meri egitzianu si narant pari-pari: Asusu de nosu pesat sa nexi de fradi cosa nosta, poita eus biu cun cali afinamentu de anima s’at pregontau de bivi e no dd’eus acuntentau. Po custa curpa no nci arrennesceus prus a poderai su sacu, po su pesu de su chi eus fatu a fradi nostu.

E Ruben pigat a nai: No s’ia nau deu de no fai mali a fradi nostu? No s’ia nau de no pensai a su mali a su sànguni chi si acàpiat a babbu nostu? No apu provau a si-nci stesiai de fai calincuna cosa de mali, contras a sa genia chi Deus etotu at beneditu in s’ajaju mannu Abramu, in Isacu e in Giacobbi? No m’eis ascurtau e imoi tocat a pagai su contu de cussa faina mala de annus a oi. Oi si torrat su contu de su sànguni de fradi cosa nosta.

Chini contat sa stòria in sa Bìbbia aciungit unu particulari scriendi: No si-ndi acatànt chi Giusepi ddus cumprendiat e chi su tramudadori de fueddus faiat sa furriada po Giusepi de su chi narànt cuddus? E Giusepi si cuat e prangit. Prus chi po làstima po is fradis, prangit po su dolori de sa sorti sua, po su chi dd’est acontèssiu in sa vida, po su chi at fatu e chi dd’ant fatu a issu.

Apustis de cussu prantu, torrat intra de cuddus e ndi pigat unu, Simeoni, e ddi ponit cadenas e dd’acàpiat. Candu cuddus fradis partint po torrai anca fiat su babbu insoru, su coru est impensamentau. Ma candu arribant a su caminu de una dii, si firmant e aberrint is sacus insoru e agatant su dinai chi ant donau po ddus comporai. Ita dannu.

E comenti at a essi chi, in prus de su trigu, s’ant torrau finas a su dinai chi eus donau? Ma no sceti su dinai de unu, ma su dinai de totus. No at a essi calincuna brulla po s’improsai? Iant pensau candu fiant arribaus a domu de su babbu, chi si fiat postu pensamentu ananti de custa faina stramba. E Giacobbi iat nau: Bosàterus seis malus. M’eis bogau a su fillu stimau, Giusepi; no eis torrau a Simeoni e mi boleis bogai fians a su piticheddu, Beniaminu. Seis comenti a pibitziris in tempus de sicu. Totu arruit asusu de mei. E Ruben narat: Dona-ddu a mei e ti-ddu torru.

E Giacobbi: Beniaminu abarrat innoi e no at a andai con bosàterus, poita no bollu morri cun cussu àteru dolori mannu.

MAC

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Load More...