Sa Bibbia frorigiada

• #inlimba
• #Sardo
• #BibbiaFrorigiada
• #Imprentas

Gei ddu bolit finas sa pobidda de su meri 

Candu unu piciocheddu est bellixeddu meda, gei si sciit chi is piciocheddas ddi currint avatu. E chi issu benit de atesu, mancai me in is mesis de istadiali, su prexu crescit ancoras. A essi bellu e a essi stràngiu, me in is biddas nostas, fiant duas cosas paris po fai arrennegai a totus cussus mascus chi totu s’annu abetànt trìulas e austu po si spassiai unu pagheddu.

In su contu de Giusepi, su meri dd’iat pigau de ogu bonu chi in pagu tempus at pigau dònnia determina in cussa domu, finas a cumandai a totus e a decidi dònnia cosa. E totu su chi faiat andàt beni. Duncas, su meri, Potifarru, ddu stimàt meda e dd’iat lassau fai totu su chi boliat. Ma in cussa domu no ddoi fiat sceti su meri, ma finas sa pobidda e a issa puru cussu piciocheddu ddi praxiat, e comenti! Una dii issa s’acostat a Giusepi e ddi pregontat de si cuai cun issa e de fai impari su chi faint pobiddus e pobiddas.

Ma Giusepi ddi narat chi no dd’at a fai mai. Su meri miu m’at donau totu su chi bollu e potzu fai in domu sua, totu cussu chi issu etotu podit e bolit fai. M’at donau dinai, fortza, tzeracus e bestiàmini de ghiai, ma m’at arracumandau de no castiai a tui chi ses sa pobidda.

Duncas, po arrespetu de issu e de Deus, no apu a corcai mai cun tui. Ma issa, amachiada comenti fiat de cussu giòvanu bellu e capatzu, no abarràt dii sena de provai a ddu fai arrui in sa trassa. No funt pagus is contus chi foras de sa Bìbbia si narant de fainas sìmbilis. E su prus de is bortas serbint a amostai chi, mancai s’òmini o sa fèmina circhint de fai dannu a su chi est beneditu de Deus, no nci arrennescint. Innantis o apustis, Deus intervenit e amparat su beneditu suu. Innoi puru, eus a biri, chi custa est una de is punnas de su contu.

Una dii Giusepi intrat a domu po fai su traballu cosa sua in ora innui no ddoi fiat nemus. Sa pobidda de su meri ddu biit, dd’aganfat a su bestiri e ddi narat cun fortza e disìgiu: Imoi corcas cun mei. Ma cussu fut lassendi sa besti sua in is manus de sa fèmina. Duncas, issa, abarrada mali po s’ùrtimu no, cumentzat a tzerriai a forti: Alliai, alliai. Cussu disgratziau de giovuneddu chi est in domu nosta at circau de mi fai disonori. Mancu mali chi mi seu posta a tzerriai a forti e si-nc’est fuiu, chi no imoi fui prangendi su mali chi mi boliat fai, a mei, sa pobidda de su meri.  

No dd’est bènnia sa faci in colori mancu candu at contau totu cussas fàulas a su pobiddu, faendi-sì innotzenti e bonixedda. Diaici, Potifarru nc’iat fatu ghetai a galera a Giusepi cun sa morti in su coru.

MAC

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Load More...