Sa Bibbia frorigiada

• #inlimba
• #Sardo
• #BibbiaFrorigiada
• #Imprentas

Candu est tropu, est tropu diaderus 

Arribau a su sartu de Sichem, iat cumentzau a fai su banduleri de una parti e de s’àtera in circa de is fradis. Un òmini ddu biit e ddi preguntat: Ita ses circhendi? E cuddu narat: Seu circhendi a fradis mius. Nara-mì innui ddus potzu agatai. E cuddu òmini narat: Nd’ant tirau is tendas insoru de innoi pagora; ddus apu intèndius narendi: Eus andai a Dotan.

Forsis a ingunis funt andaus. Giusepi no si ddu fait nai un’àtera borta e lestru andat a faci a ingunis po circai a fradis suus. Po aciungi unu fueddu nostru: gei ddi pariat diaici de importu a circai a is fradis! Apustis de su chi dd’iant nau e de comenti issu si fiat fatu mannu cun issus, no si cumprendit ita est circhendi de is fradis.

E cussus ddu biint de atesu mannu e, innantis chi s’acostessit a issus, su pensamentu contras a Giusepi no fiat de fradis. Sa primu cosa chi ddus fait fueddai est sa disamistadi po cussu fradixeddu bantaxeri e palleri. Duncas, su primu disìgiu est a si dda fai pagai, finas bocendi-ddu. Candu sa tìrria est manna, su coru si intostat e no ddoi est nudda chi dd’ammoddiit.

Si narant pari-pari: Allei-ddu. Arribau est su meri de is bisus. Tocai, ddu boceus e nci-ddu ghetaus a calincuna forada o a calincunu putzu. (Arratza de coru de fradis chi tenint!). Apustis chi dd’eus bociu e cuau, eus a podi nai chi ndi-dd’at papau un’animali mau. Diaici gei dd’at a passai su pìbiri de is bisus. A chini creit de artziai tropu, at a depi imparai a arrui; e chini arruit de artesa manna, fait stragatzu mannu.

Ma cussus fradis no fiant totus ugualis; Ruben – chi teniat in coru de ddu sarvai – a is fradis ddis narat: Candu mai eus a bociri a unu fradi? No est cosa bella bella a bociri a unu fradi! No ddoi est bisòngiu perunu de ddu bociri: nci-ddu ghetaus a custu putzu e ddu lassaus ingunis aìnturu. Ma cussu teniat bidea de ddu sarvai e de nci-ddu portai anca fiat su babbu.

Parit una cosa bella, ma cali at a essi su motivu, no ddu podeus sciri. Candu Giusepi est arribau acanta de is fradis, cussus ddu pigant, ndi-ddi tirant sa besti bella chi dd’iat arregalau su babbu, cussa a mànigas longas, ddu spollant, nci-ddu ghetant a su putzu, mancai ingunis aìnturu no ddoi fessit àcua.

No parit stramu chi in su desertu no ddoi siat àcua, ma assumancus me in is putzus! Giusepi abarrat in cussu putzu comenti in d-una presoni. Ma su diàulu fai is pingiadas, ma cobertoris no ndi fait. Duncas no s’at a cuncretizai ni s’idea de is fradis de ddu bociri, ni cussa de Ruben de ddu tramudai anca fiat su babbu. Candu Deus si ponit intramesu, scònciat is giogus.

MAC

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Load More...