Sa Bibbia frorigiada

• #inlimba
• #Sardo
• #BibbiaFrorigiada

Is duus fradis si-nci stèsiant etotu

Chi unu pensat chi sa paxi si pesat a basidus e a imprassus, no at a essi mai in paxi diaderus. A bortas sa gherra si bincit cun fueddus, cun chistionis fortis, sèmpiri cun su disìgiu de serrai una genna e aberendi-ndi un’àtera. Candu is duus fradis si funt atobiaus e ant prantu de su prexu e ant chistionau e si funt cumprèndius apari, su prus mannu, Esaù, comenti a sèmpiri, si fait movi de s’impèllida.

Est totu pigau de coru de cussu fradi chi est torrau càrrigu de benis e de stima po issu, chi nci-ddu bolit portai a domu sua, comenti e chi mai fessit acontèssiu nudda. Fiat arribau cun totu cussus òminis a cuaddu e iat fatu timi a su minori collionadori, ma si fiat fatu mudai in pressi. Giacobbe pariat scrètiu de totu cussa bonesa, ma no si fiat fatu ingiriai de Esaù.

At a ai fortzis pensau: Gei no m’at a collionai cussu crabu de fradi miu? Esaù ddi narat: Ajò a domu. Ndi bogaus barracas e statzus e torraus impari a sa terra nostra. Deu ti passu a in antis e tui mi benis avatu. Diaici est chi ddu boliat! E su fradi, abistu, dd’arrespundit: Nossi, nossi! Gei no t’apu a fai trigai deu fadendi-tì camminai a bellu po mori de is fillixeddus mius… Nosu seus medas e no podeus poderai su passu de is cuaddus tuus ni sa fortza tua. E su bestiàmini? No seus avesaus a caminai meda, ca pasciaiaus in cungiaus serraus e teniaus su meriagu sèmpiri acanta. Tui bai in paxi e atendi a su beni cosa tua. Nosu eus a benni a bellu a bellu segundu su chi est sa possibilidadi nosta. E su fradi sighit a nai: Gei ddu cumprendu! Ma permiti-mì de ti lassai unus cantu de custa genti chi est cun mei po t’acumpagiai e po no ti fai acontessi nudda in su caminu. Giacobbe at a ai pensau: Mmm… custu mi bolit acapiai a corrias strintas. Gei no apu a essi torrau po mi cumandai cussu o mi tenni comenti a stràngiu in domu mia. E ddi narat: Bai cun totu sa genti chi t’at acumpangiau, ca deu mi dda pigu cun sulenu. Mancai apu a imbati a Seir apustis de una parighedda de diis, no ti pongas pensamentu. Tui lassa su mundu comenti est e bai. Candu eus a arribai, eus a tenni tempus de abarrai impari.

Duncas, Esaù ddu saludat e si-ndi andat cun totu cuddus chi dd’iant acumpangiau po arribai a ingunis. Giacobbe ddu càstiat, stesiendi-si-nci, finas a candu no ddu biri prus. A s’imbressi de su chi iat nau a su fradi, pigat e movit po andai a Succot, chi fiat totu in d-un’àtera ala de sa terra de su fradi. S’ant a torrai a biri sceti po sa morti de su babbu, Isacu.

MAC

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Load More...