Sa Bibbia frorigiada

• #inlimba
• #Sardo
• #BibbiaFrorigiada

Arribat s’ora de si-nci andai

Apustis de unus cantus de annus in d-unu traballu, unu pensat a cresci, a si-nci andai, a mudai logu e mestieri. Chi podit e chi agatat logu, pigat su determinu de nci andai, pruschetotu candu po annus at dèpiu traballai cun d-unu meri margiani e collionadori.

Giacobbe – narat sa Bìbbia in su primu libru in su capìtulu trintunu – ca iat cumentzau a biri me in is ogus e in sa cara de is connaus, fillus de su sorgu (ma no narat chi fiant fradis de is pobiddas), malesa, disamistadi e gelosia. Iat intèndiu chi narànt: Cussu fradili nd’at furau totu su beni a babbu e a nosu e cun cussa prenda s’est fatu su beni suu.

Tzertu, no fiant fueddus de stima ni de fraternidadi. Ma, de seguru, mancu Giacobbe si-ndi fiat abarrau sena de imperai malesa e trassas malas contras a tziu e fradilis. E finsas su tzieddu no pariat chi dd’istimessit comenti a candu dd’iat arriciu. E sa Bìbbia fait intervenni a Deus: est issu chi giait su permissu e sa beneditzioni po si-nci stesiai de su tziu e po torrai a domu sua, mancai su fradi siat ancora inchietu e no nc’essit ancoras ingùrtiu sa trassa.

E Deus Sennori narat: Torra a domu de babbu tuu, a sa terra de is ajajaus tuus, ca gei t’acumpàngiu deu! Duncas Giacobbe, chi no si-ndi bolit andai sena de tenni a s’ala sua is pobiddas, dd’as tzèrriat e ddis fait unu paru de contu in curtzu.

Sa faci de babbu de bosàteras est arrrennegosa e contras a mei; no tenit prus cussa bellesa de is primus tempus. Perou, Deus Sennori de domu de babbu no m’at mai lassau a solu e mi-nc’est acumpangendi ancoras oindii. Gei ddu scieis totu e is duas chi de sa dii chi seu arribau no mi seu pasau mancu unu segundu traballendi po issu e po su bestiamini suu. E issu no m’at collionau una borta sceti, ma m’at mudau sa paga chi mi depiat assumancus dexi bortas. Pagu si parit? Epuru, mai nc’est arrennèsciu a mi binci in totu, poita Deus est sèmpiri a s’ala mia e no si-ndi scarescit. Naràt ca fiat po mei su bestiàmini ammanciau e is pegus fiant ammanciaus; naràt nieddu e fiant nieddus, naràt àteru e fiat àteru. Deus etotu faiat comenti a su fueddu suu, po tramudai su bestiàmini a manus mias. E su corrieri suu at sighiu: Giacobbe. E deu: Cumandit! E issu: Deu seu su Sennori chi as bisau in Betel, sa domu de Deus, innui as pesau e olliau una pedra de lacana e innui as fatu votu. Chi no ti dd’arregordas, abarra seguru ca gei mi dd’arregordu deu. Duncas, pesa de pressi e parti faci a domu tua, a bidda tua.

Custu dd’iat nau s’àngelu de Deus e cussu iat torrau a nai, frorigiau, a is pobiddas. Tocat a biri chi si-ndi bolint stesiai de domu de su babbu insoru.

MAC

E' sempre tempo per abbonarsi a L'ARBORENSE

Approfitta delle nostre promozioni.

CLICCA QUI per sapere come fare

Tweet

Leggi anche

Una stèrrida de sa chistioni (parte 1)

Sa nàscida de is duus fradis (parte 2)

Cussa gentilla benedita (parte 3)

Isacu a sa moda de su babbu (parte 4)

Fainas de Isacu e is tzeracus (parte 5)

Tocat a sceberai su capu… (parte 6)

Ma esti fradi miu? (parte 7)

At abarrai beneditu (parte 8)

At a essi ora de andai atesu (parte 9)

Chistionis de coja (parte 10)

Su bisu est avisu (parte 11)

Acanta de unu putzu (parte 12)

Una pedra manna meda (parte 13)

Unu stràngiu in domu allena (parte 14)

E chi ti mudant sa paga? (parte 15)

Poita apu traballau? (parte 16)

Pobiddas certadoras (parte 17)

Candu est tropu… (parte 18)

Is ùrtimus fillus (parte 19)

Un’àteru certu (parte 20)

Load More...