- Dettagli
- Domenica, 16 Giugno 2024 10:58
- Scritto da Redazione
Fràntzia: Unu giornali catòlicu fueddat de sessualidadi a giòvanus e mannus
Dd’eus scritu àteras bortas finas in custas pàginas chi, a fitianu, is giornalis si faint de is giornalis e is novas nascint ligendi su chi àterus scriint. E su contu finas de is novas de bidda e de is crastulìminis: mudant de una buca a s’àtera e donniunu furriat e aciungit.
Po su giornalismu depit essi diferenti, poita chini scriit depit essi seguru de sa nova, cumprendi comenti est acontèssia e dda depit contai in sa manera prus crara. In su giornali de is paras paolinus, Jesus, apu lìgiu una nova de curiosidadi e de interessu. In su giornali chi bessit dònnia cida in Fràntzia, Famille chrétienne, est acanta de bessiri, in su chi oi ddi narant podcast, sa filera de tres puntadas registradas in contu de su tema de is sposus e de sa vida sessuali. Cumentzada in su 2021, depit sighiri poita genti meda at ascurtau cussas registrazionis e nd’at scrùfiu agiudu mannu.
Chistionat una psicoterapeuta, Elena Dumont, chi tenit scièntzia manna in cussa materia e nci arrennescit a si fai cumprendi de chini ascurtat. Candu at cumentzau, iat postu in pei dexi puntadas, ma in medas ant pregontau de sighiri e ant postu preguntas in contu de àterus temas. Duncas, si fueddat de ita acontessit in su primu tempus de sa stima; comenti si podit fueddai finas intra genti manna de edadi de sessualidadi sena de bregùngia peruna. Dotora Dumont agiudat finas a cumprendi chi si podint e, forsis, si depint nai a s’àteru e a s’àtera is cosas chi praxint e is chi no praxint.
In prus, no at lassau sena de unu fueddu finas sa chistioni de candu calincunu de is sposus perdit sa conca po calincunu àteru e arriscat de ndi ghetai a terra totu: comenti est possìbili a si perdonai e a andai a innantis? Ligendi custas cosas o ascurtendi cussas puntadas forsis no si fait spantu e, chi pensaus a is giòvanus, si parint de pagu importu.
Is piciocheddus, giai a piticus, connoscint meda de prus de su chi sciestus nosu – est berus – ma no sèmpiri sciint comenti cumprendi su chi tenint in coru e su chi acontessit acanta de issus. Po is mannus catòlicus, invècias, no est cosa de dònnia dii a chistionai de custas cosas; pruschetotu chi est unu giornali catòlicu chi at pensau a custa faina.
Cussu programma no mudat su mundu de fundamentu e no est mancu sa rivolutzioni in contu de cussu tema, ma est una manera de fai a cumprendi chi si podit chistionai de totu e chi su de nai finas custas fainas in craru agiudat. Chini at fatu calincunu atòbiu cun giòvanus chi si depint cojai podit nai ca candu si fueddat de bàsidus, de imprassadas, de sa bellesa de totu cussu chi faint e depint fai is sposus po espressai sa stima s’unu po s’àtera, calincunu si ndi bregùngiat, bessit arrùbiu o càstiat chini est fueddendi comenti e chi su chi si narat no siat matèria de bogai a pillu.
Po tempus meda sa sessualidadi est stètia cosa de dimònius e de stèsiai de sa vida de su cristianu e finas de is sposus, scarescendi-si-ndi sa manera chi Deus etotu at donau a s’umanidadi po fai nasci fillus e s’abisòngiu de totus de s’intendi stimaus cun d-unu basidu, un’imprassu.
Su corpus chi teneus no est de grisai ni de sprètziai, poita est sa domu de Deus, at scritu santu Pàulu. In prus, Deus etotu s’at fatu cun d-unu corpus chi narat chini seus, comenti seus e su chi teneus in coru. Duncas, est bellu a si connosci e a chistionai de su corpus.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.