• #L'Arborense
• #ArcidiocesidiOristano
• #inlimba
• #Sardo
• #Imprentas
• #MicheleAntonioCorona

Santeru. Chèscia manna po su dinai chi tocat a bogai po firmai sa màchina in sa costa

Sàbudu trexi de làmpadas in sa costa de su Sinis, chi pertocat a su Comunu de Santeru, s’est cumentzau a pagai po firmai is màchinas in oru de mari. S’annu passau si fiat cumentzau in su mesi de austu, poita su progetu iat chèrfiu una surra de tempus e de traballus (cartellus, detèrminas e àteras cosas).

Ocannu s’est cumentzau in tempus, mancai s’Amministratzioni comunali chi dd’at pesau, chèrfiu e publicau no siat prus sa chi cumandat in Comunu. Ma ita est sa nova, chi seus avesus a pagai po firmai sa màchina in dònnia logu chi andaus? Sa nova est chi s’arregulamentu po firmai sa màchina de s’Anea Scoada finas a su Crastu Biancu est malu a cumprendi. Provaus a ddu spiegai mellus. Ant pàrtziu su territòriu e is tarifas in tres partis.

Sa prima pertocat a chini est residenti in su Comunu de Santeru e in sa costa o chini tenit una domu e pagat sa tassa po s’àliga: is chi funt in custa categoria podint pagai cincu èurus e otenni unu billeteddu de atacai a su bidru de sa màchina e dda podint firmai in totu is arrugas innui ddoi funt domus (S’Anea Scoada, Putzu Idu, Mandriola, su Pallosu, sa Rocca Tunda, su Crastu Biancu). Chini no apartenit a custa categòria podit firmai sa màchina me in is arriguas de is domus, ma depit sperditziai una surra manna de dinai (20 èurus a sa dii, sena de podi pagai a oras). E dònnia meri de domu podit otenni finas a cincu de cussus billetus a 5 èurus donniunu. Sa de duas prevedit chi chini invècias bolit andai a mari – finas is chi tenint sa domu e ant giai fatu su billetu de cincu èurus – e firmat sa màchina a oru de sa praja – in is logus chi funt cuncordaus po custa faina – podit pagai a oras o a dii intrea, opuru fai s’abbonamentu po totu s’istadiali: po is chi tenint domu est 15 èurus a màchina e po totus is àterus 40 èurus. Chini no si bolit comporai s’abbonamentu podit pagai a oras o po totu sa dii (8 èurus). Ma totu custu no balit po s’arruga manna a oru de sa praja de Putzu Idu.

Allodda sa de tres: po firmai sa màchina ingunis tocat a pagai un’àteru abbonamentu de 50 èurus chi tèngiat domu o no ndi tèngiat. Chi no si bolit pagai s’abbonamentu, si podit pagai a oras o a dii intrena (15 èurus). In custa diis passadas si podiant fai is abbonamentus in sa domixedda acanta de sa crèsia de Mandriola o in s’arretza, in su giassu muvin.it, ma po otenni is billeteddus tocat a andai etotu a cussa domixedda. Sàbudu a mangianu s’oràriu de s’ufìtziu fiat de is 9 oras a sa 1 e a is seti e mesu ddoi fiat giai genti abetendi chi aberressit.

A is noi oras, candu su piciocu chi at fatu su traballu suu at spiegau comenti si faiat a otenni su billetu, ddoi fiant trinta personis. Sa chèscia de sa genti fiat poita tocat a pagai su parchègiu candu si pagant giai currenti, àcua, àliga e sa tassa po sa domu; in prus, po sa basca manna chi s’est provada in cussas oras de abetu. Forsis si podiat pensai calincuna àtera manera de podi fai cussu billetu o donai unu pagheddu prus de tempus po ddu podi fai cun sulenu (s’avisu est de su 10 de làmpadas – in su giassu de su Comunu – e su 13 ant cumentzau a controllai). Duncas, si podiat abetai assumancu cuìndixi diis po donai su tempus a chini ddu depit fai de no si depi tirai su tzugu; opuru pediri a sa cooperativa chi tenit s’apaltu de fai prus oras in s’ufìtziu: dònnia dii a mangianu e a merii e finas sàbudu e domìnigu.

Poita chi su 13 de làmpadas at traballau a su mangianu e innantis de cussa dii no at pòtziu pigai su billetu, comenti depiat fai su sàbudu a merii e su domìnigu totu sa dii? At dèpiu pagai sa tarifa intrea comenti a chini no tenit domu? E chini si boliat fai s’abbonamentu po totu s’annu comenti at fatu? At pagau comenti a chini benit una dii sceti? Ma tocat a nai un’àtera cosa: est diaderus malu su chi est stètiu pensau po is chi tenint domu?

Sa punna de chini dd’at imbentau e pesau, forsis, no est mala po chini tenit domu: poita podint firmai sa màchina me in is arrugas sceti is chi tenint domu o is parentis. Bolit nai chi ant a tenni prus logu de is annus passaus, innui totus podiant firmai sa màchina in dònnia logu.

Ma, a su chi narant is chi ddoi bivint e a su chi si biit passillendi, funt medas is arrugas innui no si podint prus mancu firmai sa màchina po comporai su pani. Po esempru, siat s’arruga manna chi arribat a s’Anea Scoada de Putzu Idu. Innantis de sa butega de Sanna ddoi funt pagus logus de firmai sa màchina mesora sceti e chini tenit s’intrada de domu ingunis, ita depit fai?

Po afortiai sa cosa e fai un àteru esempru: po comporai calincuna cosa in s’àtera butega de Mandriola, comenti si depit fai? Innui tocat a firmai sa màchina? Is chi controllant ant a fai is sturrus cuaus po ponni multas o ant a cumprendi? Ma chi sa chèscia fait parti de sa nàtura e chi ddoi funt motivus chi balint po ddu fai, tocat a fai unu giru in su giassu de su Comunu de Crabas e biri chi ingunis puru s’imperat su pròpiu sistema po is domus de Funtana Meiga.

In custu tempus s’at a depi cumprendi chi su sistema est bonu e andat beni o chi no. S’at a depi torrai a scriri calincuna cosa a s’acabbu de s’istadiali, candu su Comunu at a presentai su chi est acontèssiu, cantu dinai ant fatu e comenti dd’ant a spendi. De seguru, tocat a ammellorai su chi est sa costa de Santeru. Assumancu unu grifoneddu ananti de Putzu Idu si podit ponni po chi pagat? E is botus de s’àliga?

* di Michele Antonio Corona

E' questo il tempo giusto per abbonarsi a L'ARBORENSE

Il giornale direttamente a casa tutte le settimane.

Scopri come fare

Tweet

Leggi anche

Spotify: un servizio musicale digitale sempre in crescita

Fake news: imbrogli e bugie

Disabilità e Sport: tante norme per tutelare un diritto di t

N@vigando: Il digital divide

Con il numero 29 ripartono le nostre pubblicazioni cartacee

Il viaggio in Perù: Don Maurizio racconta l'intensa esperien

L'emozione di Mons. Carboni nell'incontrare la comunità sicu

Celebrato il 25mo anniversario dell'ordinazione di mons. Rob

L'OFTAL accompagna 80 persone con disabilità in pellegrinagg

Giubileo dei Giovani: l'intervista a don Marco Ruggiu

Campo scuola a Belvì: un'esperienza indimenticabile per 32 r

Riflessione. Tempo del Creato 2025

L'editoriale del 13 Luglio 2025. Sacerdoti: uomini, non supe

Il dramma della guerra in Ucraina: l'esperienza di don Ignaz

Fine vita: siamo padroni della nostra vita?

Intelligenza artificiale: la posizione di Leone XIV

L'ex carcere di Piazza Manno: un edificio da riqualificare

E' arrivata l'estate: necessario idratarsi con cura

Desulo. Il restauro del simulacro dell'Assunta dell'artista

Il ricordo di Bernardo Zizi, cantore di storia, fede e vita

Load More...