- Dettagli
- Domenica, 24 Maggio 2026 12:11
- Scritto da Redazione
Àfrica. In medas Stadus sa pesta de sa gherra e de sa violèntzia est cosa de dònnia dii
In su biàgiu chi su Paba at fatu in terra de Àfrica no at tìmmiu a nai su chi dònnia dii est acontessendi in medas de cussus Stadus: violèntzia, gherra, fàmini, mortus e genti disterrada. Me in is televisionis nostas pagu si-ndi fueddat, poita totu parit dedicau a sa gherra in Ucràina, in Iran e in Gaza, e tocat a ndi chistionai, poita funt una destrossa manna chi fait mortus dònnia dii.
Ma ddoi funt logus innui si morit o si campat comenti a mortus e no-ndi fueddat nemus. Unu giornali chi no ammancat de-ndi scriri, agiumai dònnia dii e de seguru dònnia cida, est su giornali de is pìscamus italianus, s’Avvenire. A nosu puru s’arrennescit de ndi scriri a bortas, poita no funt pagus is missionàrius o genti chi tenit a coru cussa terra e chi ligit custas pàginas.
A chini no est avesu a ndi ligi, iat a essi ora de ddu fai e de circai in s’arretza totu cussu chi me in cussus Stadus acontessit. In s’ìsula de su Madagascar est giai de diora chi sa Genia Z est chescendi-sì a manera forti contras a sa prepotèntzia de sa polìtica e de is sordaus. Totu est cumentzau po su motivu chi su Stadu no donàt currenti ni àcua de bufai me in is grifonis.
Duncas, is giòvunus ant cumentzau a calai me in is arrugas e me in is pratzas e a fai burdellu. Su presidenti, Andry Rajoelina, si-ndi fiat fuiu e s’est cuau. Su colonellu Michael Randrianirina s’est postu a cumandu de su Stadu e de is sordaus, ma sena de batiri beni perunu. Imoi funt provendi a fai cumandai un’àteru Guvernu, postu in pei de su colonellu, ma parit chi no siat mudau nudda e sa chèscia sighit a cresci. In Nigèria, su 10 de maiu ant mortu a 117 personis in d-un’atacu fatu cun is aèreus in su mercau de Tumfa, in sa parti arta de su Stadu.
Ingunis funt morendi po mori de is trupas de sa Jihad islàmica e de trupas de bandidus chi furant dinai, pigant a òminis e ddus òbrigant a cumbati, faint dannu mannu a pipius, bècius e fèminas o ddus bocint in deretura. S’ùndixi e su doxi de maiu in Kènia, in Nairobi, ddoi ant fatu un’atòbiu cun trinta Stadus e su presidenti de sa Frància, Macron, po studiai una manera de torrai a tenni arrelatas e donai agiudus chi serbint. In cussu atòbiu ant impromìtiu 23 milliardus de dòllarus po fai òperas chi donint traballu e portint beni in cussa terra. In s’ìnteris de cussu atòbiu, Macron at fatu citiri a sa genti chi fiat ingunis cun maneras pagu tzivilis e po custu est stètiu criticau.
In Mali is camionistas no ant chèrfiu batiri a sa capitali cosa de papai e àteras cosas chi serbint dònnia dii, po mori de su prètziu sèmpiri prus artu de su carburanti e de su chi ant fatu trupas de Boko Aram contras a siendas. Ant finas postu fogu a màchinas e fatu sciàsciu mannu. E meda ancora ddoi at a essi de scriri.
* di Michele Antonio Corona
E' questo il tempo giusto per abbonarsi a L'ARBORENSE
Il giornale direttamente a casa tutte le settimane.
Leggi anche
Focus
Le edicole chiudono: si legge di meno?
Europa: la nuova Carta d'Identità Elettronica diventa obbligatoria
Jeans e Made in Italy: un'iniziativa per tutelare le eccellenze di marchio italiano
Il Bar di Ibba: un edificio identitario per Oristano
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
Incontri
Il romanzo di Massimiliano Perlato ambientato a Marceddì: intrigante e ben confezionato
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.