- Dettagli
- Domenica, 26 Ottobre 2025 10:28
- Scritto da Redazione
Comunus. Comenti si depit e si podit fai sciri a totus su chi fràigat s’Amministratzioni
Seus sèmpiri avesus a si chiesciai po su chi s’acontessit e po su chi bieus fatu de is àterus. Su Comunu no est faendi nudda, su Guvernu pigat sceti dinai, is polìticus no traballant, is impostas funt sèmpiri de prus e su stipèndiu no bastat prus po campai. E diaici, sighendi in dònnia campu, teneus sèmpiri cosa de nai. Po nai sa beridadi, no si tenit tortu in medas cosas e bieus chi giai in domu nosta po fai unu progetu ddoi bolint annus.
Chini si proponit po fai su sìndigu, innantis de is eletzionis, bogat a pillu unu muntoni mannu de ideas bellas: logus de arrangiai, localis de fraigai, pratzas de ammelliorai, progetus po piciocheddus… Ma apustis de duus o tres annus de Amministratzioni no si biit ancora nudda. E, duncas, totus narendi cosa.
Tocat a sciri, e forsis totus ddu sciint, chi po dònnia faina chi s’Amministratzioni pùbrica depit pesai ddoi bolint de cuatru a cincu annus. Innantis tocat a fai su progetu e sa delìbera, apustis a pesai sa gara de apaltu, apustis a donai su traballu a chini dd’at bintu. Medas bortas, chini no at bintu fait arrecursu a su TAR.
Chi ddu bincit, tocat torrai a fai totu; chi no, partit s’apaltu. E funt giai passaus una bellesa de annus. Sa dita cumentzat, ma no passat tempus meda chi si firmat po una cosa o po un’àtera e su tempus passat. Candu cussa Amministratzioni est spacendi su tempus, o dd’at giai spaciau, cussu progetu arribat a s’acabu. E diaici po dònnia cosa e dònnia idea. E chi finas a innoi est totu connotu, tocat a pensai ita si podit fai in s’interis. Me in is comunus piticheddus, benit prus a conca a nai chi s’Amministratzioni noa no est faendi nudda, chi is bias funt arrogadas, chi su logu est brutu, chi is luxis de is arrugas funt studadas.
E duncas? Candu si fueddat cun su sìndigu o calincunu assessori, narant chi ant fatu custu, cuddu e cudd’àteru ancora; chi funt traballendi po pesai cudda cosa e chi mancat personali. E poita ddu nai e no ddu scriri? Invècias de chistionai cun s’unu e cun s’àteru, poita no pensai a calincuna manera po fai sciri a totus su chi mesi cun mesi si fait?
Chini ligit at a pensai chi est giai fatu in su giassu de su Comunu. Opuru in su grupu Whatsapp de su telefoneddu. Segundu mei no bastat. Ingunis si scriint is bandus, is detèrminas, is contributus, ma no si narat su chi fait chini guvernat. De pagu, chistionendi cun d-una sìndiga de una bidda pitica, m’at nau chi me in is mesis de ierru, dd’est tocau a andai dònnia merii a allui is luxis de sa bidda, poita sa centralina si fiat abruxada e no teniant a s’operaju comunali.
Ma sa genti, chi trigàt dexi minutus, teniat giai cosa de nai. Duncas, no iat a fai a scriri unu billeteddu dònnia mesi o dònnia duus mesis e a ddu spraxi domu cun domu? In biddas de centu, duxentus o terexentus famìllias no est una spesa diaici manna. In biddas prus mannas est mellus a tenni una pariga de logus in bidda innui s’apicat unu billetu e si narat su chi s’est faendi e su chi no est prus possibili a fai e si narat su motivu.
In su tempus de sa tennologia parit cosa bècia e scadia, ma funtzionat ancora. Verba volant, scripta manent.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.