- Dettagli
- Domenica, 02 Novembre 2025 10:13
- Scritto da Redazione
In su tempus de computer e telefoneddus serbit ancoras a scriri a pinna?
Tra is giornalis e rivistas chi ant fatu sa stòria de su Noixentus in Itàlia, tocat a ponni me in is postus de unu a cincu, de seguru, Famìllia Cristiana. Innantis de is telefoneddus, totus si-ndi arregordaus comenti unu muntoni mannu de fèminas e de òminis, volontàrius, oferiant cussu giornali a s’acabu de sa missa de su domìnigu a mangianu.
Si naràt: sa bona imprenta! Arregordaus puru comenti finas a is annus Otanta, me in is arrugas girànt unu muntoni de òminis cun su giornali asuta de bratzu, faendi biri su tìtulu de su giornali e luegus si cumprendiat a chini votànt. E Famìllia Cristiana est sèmpiri stètiu unu giornali cun meda argomentus e temas: de cussus religiosus a cussus tzivilis, de novas de Crèsia a cunsillus de dotoris o de genti de mestieri. E ancora est diaci, ma imoi si ligit prus pagu e s’acuntentaus tropu de su chi agataus in su telefoneddu, perdendi su cuntatu cun su paperi e cun sa letura asusu de su paperi.
In scolas meda sa chistioni est: depeus ancoras fai comporai librus a is piciocheddus o bastat su telèfonu o su computer? Ancoras de prus oi chi cun s’Intelligèntzia artifitziali finas a donai a fai còmpitus in domu parit cosa chi no serbit. Est ancoras possìbili a pretendi de is piciocheddus de tradusi una pàgina de Ciceroni o Ovìdiu de su latinu? Chi provais: bastant dexi segundus e teneis sa bortadura in su tempus de una gruxi. In su nùmeru de custa cida, in cussa rivista catòlica ddoi apu agatau un’artìculu chi m’at fatu pensai meda: scriri a manu e a pinna est mexina po sa personi chi ddu fait.
Duncas, narat su giòvunu giornalista Gianluca Dotti, chi no est a amparai su scriri po is àterus, ma po sei etotu. No est chistioni de biri sa bella scritura o cantu unu est bravu a movi didus e pinna, ma a permiti a s’ànimu de ndi bogai a foras cun sa scritura su chi teneus aintru. Chini, de is mannus chi ligint, at scritu in su diàriu personali?
Ddoi funt, in sa stòria, unu muntoni mannu de filòsofus, professoris, literaus, pabas, teòlogus, stòricus, polìticus, generalis, chi ant lassau is scritus insoru. Medas de cussus ant pròpiu lassau is pensamentus chi dònnia dii faiant apustis de su traballu, de is fainas polìticas o culturalis. Po nd’ammentai unu sceti, bastit a pensai a paba Giuanni su de Bintitrès, chi at lassau su Diàriu de s’ànima, cun totu su chi dd’est passau in su coru innantis e in s’interis de su Contzìliu Vaticanu de duus.
Ma scriri a pinna est diaderus cosa chi curat. Professora Giada Cipolletta narat: Is personis no funt prus avesas a nai su chi tenint aintru e prus pagu ancoras a ddu scriri. Imoi totu faeus cun su telefoneddu e ingunis scrieus in pressi su chi si parit de importu.
Sèmpiri de prus no teneus tempus de scriri mancu ingunis e dd’arregistraus, tirendi a foras frùminis de fueddus chi bolant. Ma scriri a pinna est ancoras diferenti de scriri messàgius, poita tocat a ddu fai cun sulenu, pighendi tempus e circhendi unu logu riservau po ddu fai in paxi.
Unu tempus po sa personi, no in mesu a milli cosas e fainas, ma in d-unu momentu firmu de sa dii. Iat a essi bellu a torrai a pigai sa pinna e a torrai a scriri, sena de pressi, sena de timoria. In prus, est bellu a torrai a ligi su chi s’est scritu s’annu innantis e a biri comenti is cosas funt diferentis o, forsis, ugualis. E Facebook si ddu fait fai, poita sciit s’importàntzia de s’ammentu.
Torraus a scriri a pinna su chi teneus in coru o su chi boleus ponni in seguresa in sa menti nosta.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.