- Dettagli
- Domenica, 21 Gennaio 2024 12:24
- Scritto da Redazione
Non podint nimancu prangi a is parentis chi morint dònnia dii po is bombardamentus
In cussa terra sderruta e stochigiada de sa gherra e de sa disamistadi, est morendi-ddoi unu muntoni mannu de genti notzenti, chi no tenit curpa de su machìmini malu de is terroristas. Po cumprendi mellus, tocat a pensai chi su terrenu cumunali de sa tzitadi de Gaza (45 Km2) est unu pagheddu prus piticu de su de Ilartzi (53 Km2), ma cun agiumai sescentumilla ànimas. Invècias, cussu territòriu chi eus imparau a connosci in sa televisioni chi ddi narant Tira de Gaza est mannu (365 Km2) cantu a cussu de Aristanis (85 Km2), de Crabas (122 Km2), de Santa Justa (70 Km2), de Marrubiu (62 Km2) e de Simaghis (27 Km2) postus apari.
Ma ingunis ddoi bivint prus de duusmillionis de ànimas, mentras me in is comunus mentuaus no arribant a cincuantacincumilla. Duncas, in dònnia chilòmetru cuadrau ddoi bivint agiumai catrumilla animas. Dònnia bomba chi ghetant bocit una cambarada manna de genti: pruschetotu pipius, fèminas e bècius.
De candu est incumentzada s’afracada militari de Israele contras a is terroristas de Hamas in cussa tira de terra, si contant prus de undiximilla mortus. Funt giai millecincuxentus is famìllias chi funt prangendi a is parentis insoru mortus. Sa giornalista Amira Hass, chi scriit po su giornali prus nodiu de Israele, Haaretz (chi bolit nai Sa terra), at fatu de pagu unu stùdiu de su chi est sutzedendi ingunis.
Scancellai una famìllia intera non est sceti una timoria, ma est realidadi dònnia dii. Su dexennoi de su mesi de Sant’Andria est morta una fèmina de 83 annus, Shaphiqa Abu Skeilleh, impari a àterus de sa famìllia sua: sa nura, sa pobidda de unu nebodi, àterus parentis de custas duas e is fillus.
Una destrossa manna chi, si non fessit acontèssia in sa gherra, faiat prangi finsas a chini est de coru fridu. Ma in s’interis in sa gherra totu parit normali e finsas is cosas prus abburrèscias si contant comenti a crònaca. Ma imoi su problema mannu in sa Tira de Gaza non est sceti chi ddoi morit genti meda, ma chi no achipint a ddus prangi, a ddus interrai, a ddus saludai.
Sa giornalista at scritu chi po sa religioni islàmica (e no sceti po cussa, ndr) est un òbrigu a partetzipai a is interrus e a acunortai sa famìllia de su mortu. Ma in custu tempus in Gaza non s’acudit prus ni a prangi, ni a interrai genti, ni a acunortai a chini abarrat biu. Oi cussa genti non nci dda fait nimancu a cumprendi ita bolit nai su corrutu, sa morti, su prantu po chini non nc’est prus.
Una neta de Shaphiqa at nau chi is bius no podint prus saludai a chini morit e sa genti parit ca no si-nd’incurat prus de sa morti de is àterus e nimancu de sa sua etotu. Sa genti no podit pensai a sa morti, poita est circhendi de bivi, est circhendi calicuna cosa de papai, logu po s’amparai, mantas o bestimenta po s’amantai. Frius, fàmini, morti, timoria, pudesciori, suferèntzia: custus funt is cumpàngius de sa genti de Gaza.
Su 24 e su 25 de su mesi de Paschixedda is bombas israelianas ant destrossau una pàriga de domus – ant nau po farta – e ddoi funt mortus 34 òminis e fèminas totus parentis intra de issus. Cuatru generatzionis ndi-ddas ant scancelladas in duas diis. Si funt sarvaus in cuatru sceti: una fèmina, sa filla de 22 annus e duus pipieddus de noi annus e s’àtera de duas cidas sceti.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.