- Dettagli
- Domenica, 11 Febbraio 2024 12:14
- Scritto da Redazione
Novas de su mundu. In Ìndia sa polìtica est acapiada sèmpiri de prus a s’induismu
De novas chi arribant de su mundu nci-ndi funt medas: in contu de is gherras, de is ideas de imbentoris, de su tempus, de sa polìtica e de sa moda. Nd’eus a contai una pariga chi eus agatau in calincunu giornali chi scriit de cosas chi acontessint in Àfrica e Àsia.
Sa prima nova arribat de s’Ìndia e si contat de polìtica e religioni in cussu stadu mannu, chi tenit unu milliardu e cuatruxentus millionis de ànimas, essendi su territòriu natzionali innui ddoi bivit prus genti de sa Terra. Duas cidas a oi su presidenti natzionali, Narendra Modi, at incingiau – mancai no siat ancoras acabau in totu – unu tèmpiu nou a su deus Rama, pesau in su logu me innui ddoi fiat una moschea.
Calincunu at a arregordai chi in su 1992 una parti manna de genti induista, de cussa chi no biit àteru chi no sa religioni sua, nd’iat sderrocau una moschea de su sèculu sexi. Cussa faina iat prodùsiu una batalla manna intra de induistas e musulmanus, fendi duamilla mortus, su prus de fidi islàmica. Imoi, apustis de essi spèndiu duxentus e dexaseti millionis de dòllarus, su presidenti at inciangiau su tèmpiu pesau in d-unu terrenu de tres ètarus.
Ma sa cosa chi lassat de prus spantaus est chi est sa prima borta chi unu presidenti at fatu una cosa aici bistiu comenti a unu satzerdotu. In prus, su tèmpiu parit chi bollat favoressi sa faina de Modi de cumbinci a is indianus a ddu torrai a votai comenti a cussu chi sciit prus de totus acapiai richesa, religioni e polìtica.
Modi, duncas, est circhendi de si fai biri bellu de sa genti prus acanta de s’induismu cirdinu finas a essi prenu sa tzitadi de Ayodhya, me innui nd’ant pesau su tèmpiu, de manifestus de su deus Rama e de issu etotu, unu acanta de s’àteru.
Candu fueddaus de clima e de motoris, si parit naturali a pensai chi nosu chi biveus me in sa parti de sa Terra chi naraus prus moderna seus is primus a circai de mudai su mundu e a ddu fai prus bellu.
Si parit, puru, ca faeus totu su possìbili po agiudai su mundu cun energias prodùsias cun su soli e cun su bentu, comporendi machinàrius elètricus, circhendi de imperai pagu gasòliu. Invècias, unu stùdiu publicau in su giornali americanu prus nodiu, su New York Times, firmau de una pariga de giornalistas de Ìndia, Cina e Mèssicu, si narat ca is primus a mudai is mezus insoru ant a essi is africanus e is asiàticus.
S’at a parri spantu, ma custu est possìbili poita in cussas natzionis sa genti andat a velotzìpedu o a motoreta. Finas medas tassistas faint su traballu insoru cun mezus a duas o a tres arrodas. In Kènya e in Vietnam s’imperant prus motoretas chi no màchinas po tramudai sa genti de unu logu a s’àteru. In sa tzitadi indiana de Mubai una famìllia fata de babbu, mamma e duus fillus setzint totu e is cuatru in d-una motoreta, comenti a nosu in sa màchina.
In s’interis in Tzina ddoi at millionis de traballadoris chi andant de domu a su logu de traballu a bitzicreta o a motorinu. Po cussu, funt medas is siendas mannas chi funt bendendi a pagu prètziu mezus elètricus. In Kènya ddoi at kilòmetrus meda po arribai de unu logu a s’àteru.
Duncas ant postu me in is arrugas mannas chi aunint apari una tzitadi e s’àtera setantaduus catanaeddus me innui is siendas ddoi ponint baterias noas e chini arribat lassat sa sua, scàrriga, e ndi pigat una càrriga. Donniuna de cussas ddis fait noranta kilòmetrus.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.