- Dettagli
- Domenica, 24 Marzo 2024 11:49
- Scritto da Redazione
In custu duamillabinticuatru agiumai metadi de su mundu depit andai a votai
Funt cuatru milliardus is personis chi ocannu depint andai a votai po fai sighiri a guvernai o po mudai a chini cumandat in sa polìtica de is Natzionis insoru. Agiumai metadi de mundu at a sceberai, o at giai sceberau, is chi ant a pigai is determinus po su tempus benidori. In custas diis – candu su giornali at a arribai a is domus de is ligidoris at essi giai acrarau – sa Rùssia est scriendi su nòmini de Putin (71 annus) in cussus billeteddus po ddu fai cumandai finas a su duamillatrinta.
At a essi sa de cuatru bortas po su zar nou de Rùssia e iat a podi no essi s’ùrtima, poita s’annu passau at fatu una lei chi ddi permitit de cumandai ancoras doxi annus, finas a su 2036. Sa morti de Aleksey Navalny, a unu mesi de is eletzionis, no at cambiau su mundu russu ni su mori de sa polìtica.
Po dda nai totu, at afortiau su cumandu de Putin e is àteras natzionis si funt postas chini contras e chini acanta de issu: sa Tzina no at nau nudda, s’Iran at nau chi no tocat a pensai ni a nai nudda in contu de is cosas de domu allena. Me in s’àtera parti de su mundu, in su mesi de donniassantu ant andai is americanus de is Stadus Aunius a votai.
A pustis de unu tempus longu chi is candidaus ant fatu a trivas intra de issus, ant andai a su votu cussus duus chi nci fiant giai in su 2020: su presidenti de imoi, Joe Biden (81 annus) e Donald Trump (77 annus). Est berus chi su licori prus imbèciat e prus est bonu, ma innoi no seus chistionendi de licoris o de sartitzu: seus chistionendi de òminis chi pigant determinus chi podint mudai su mundu! Candu su presidenti Obama at cumentzau sa prima borta, teniat 45 annus e nosu teneiaus a presidenti de sa Repùblica a Giorgi Napolitanu (84 annus) e a Presidenti de su Cunsillu a Sìlviu Berlusconi (73 annus).
In su mesi de làmpadas ant a essi bintiseti is Natzionis europeas chi ant a depi eligi a is consilleris de su Parlamentu de Strasburgo, mandendi a su votu prus de cuatruxentuscincuanta millionis de eletoris. No est cosa de pagu contu po s’economia de totu cussa genti, po sa seguresa polìtica in custu tempus chi sa gherra at torrau a tocai su Continenti bèciu e po tenni fortza cun s’Amèrica, sa Tzina, sa Corea e sa Rùssia etotu.
Ant a essi 65 in totu is eletzionis in su mundu: de calincunu logu no nd’eus mancu a intendi nudda e no eus a sciri ita ant detzìdiu, po àterus scieus totu e ddus eus a sighiri dii cun dii. Intra de cussus chi si parint prus de importu ddoi funt Mèssicu, Sìria, Iran, Ucràina (chi ant a votai in su tempus benidori), Ìndia, Sudàfrica, Inghilterra.
Ma chi nùmerus e nòminis funt de interessu, forsis est prus giustu a arregordai chi in medas de custus logus sa democratzia no esist po nudda o pagu. In calincunu Stadu si votat, ma si sciit giai chini bincit, in calincunu àteru is votus s’ammesturant e si narat chi at bìntu chini detzidit su Guvernu, in àterus si podit votai ma sa gherra tzivili est in s’oru de sa genna.
In su mundu nci funt 24 democratzias chi ddis narant perfetas (7,8 %), 50 chi ddis narant imperfetas (37,6 %), 34 chi no si cumprendit chi funt democratzias o no (15,2 %) e sa bellesa de 59 – su prus de totus – de Guvernus totalitàrius, chi cumandant sena de timoria peruna de no essi democràticus (39,4). Ita nd’at a bessiri de su mundu chi seus connoscendi, a pustis de ocannu?
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.