- Dettagli
- Domenica, 08 Dicembre 2024 09:46
- Scritto da Redazione
Paschixedda. Butegas e comunus circant de cuncordai sèmpiri mellus e de prus
Candu in dònnia tempus ddoi est dònnia cosa, no est prus tempus. No sciu bosàterus, ma deu mi seu spantendi dònnia annu de prus po sa pressi chi si tenit a cuncordai po sa Paschixedda. Binti diis a oi apu giai biu in d-una bidda de sa diòtzesi nosta luminàrias apicadas in su stradoni de bidda prontas a allui. In prus, in is primus diis de su mesi de Santu Andria una butega manna de Aristanis fiat giai mudendi su de bendi e de comporai: de tapissus e lentzolus a arrègulas po Paschixedda.
Unu muntoni mannu de giocàtulus, de lantieddas, de mustaioneddus bistius in colori arrùbiu, de babaloteddus prexaus, de cositeddas chi sonant cantzoneddas e càntidus de Nadali. Ma – si bollu preguntai – totu custu est giustu a ddu fai giai in su mesi de Santu Andria? E in calincunu logu giai in su mesi de Ladàmini?
E no seu narendi fàulas. Chini est intrau a calincuna butega manna de Aristanis o de calincuna tzitadi – deu dd’apu biu in Casteddu – at biu chi boboeddus de ciuculati o de nuxedda cun coloris de Paschixedda fiant giai prontus in su mesi passau. In prus, imoi de calincunu tempus est intrau cussa Cenàbura niedda (Black Friday) chi est unu paru de Paschixedda antetzipada.
Totus a comporai arregaleddus e cosas chi serbint e no serbint. Una circa de is mesis de istadiali s’at nau chi sa conca de su cristianu, candu biit cosa prus a baratu, no nci arrennescit a cumprendi beni e còmporat totu cussu chi biit a prus pagu prètziu. Duncas, finas custa cenàbura si-nd’at furau sa bellesa de sa Paschixedda e de is arregaleddus.
Deu no seu po naturali unu chi prangit is tempus antigus e seu prexau chi su mundu mudit, poita est sèmpiri stètiu diaici. De su tempus chi ddoi fiat s’arroda, a candu ant fatu su làdrini, a candu ant postu su giuali a is bois, a candu ant cumentzau a scriri, finas a candu in tempus de oi si funt imbentaus is calculadoris e is telefoneddus.
Dònnia tempus pesat sa cosa sua. Ma oi cun custa faina de si fai intendi sa Paschixedda giai in mesi de Ladàmini o de Santu Andria no andat beni. Is primus de su mesi de Santu Andria in d-una butega de Tàtari apu biu cun is ogus mius a un’òmini cun barba e bestiri arrùbiu faendi a Babbu Nadali. Fiat giai faendi su bandulleri po fai fotografias cun piciocheddus e fiat pregontendi dinai.
Prus de cincuanta diis innantis de sa dii de Paschixedda. E seus bivendi custu antètzipu de sa festa dònnia dii de prus e finas in is biddas nostras. Finas a candu ddu faint me in is tzitadis, si cumprendit, poita est s’interessu de fai dinai chi cumandat. Ma candu s’apicant me in is arrugas de domu nosta luxis e lantieddas, mi parit faddina manna. Ita narais de torrai a cumprendi su tempus chi seus bivendi?
A chini est arribau finas a s’acabu de custus fueddus, ddi pregontu de si fai sciri su chi pensais de su chi eus nau e de su chi seus scriendi in custas pàginas. Su fueddu chi s’arribat, s’agiudat a cumprendi mellus su chi faeus e su chi est de fai ancoras.
Tocai, scrieis calincuna literedda in punta de billetu e no timeas de si chesciai, ca su diretori nostu at a cumprendi ita depit fai po s’annu chi benit e s’at a cuncordai unu giornali prus bellu ancoras de su chi ligeus dònnia cida. Sena de su fueddu de donniunu no podeus avalorai custa faina.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.