• #L'Arborense
• #ArcidiocesidiOristano
• #inlimba
• #Sardo
• #Imprentas
• #MicheleAntonioCorona

Aristanis. Su servìtziu sotziali e su Plus ant fatu cumprendi ita si podit fai po is pipius

In sa ludoteca de Toràngius, cenàbura 5 de làmpadas, a su mericeddu, una corantina de personis si funt atobiadas po ascurtai e chistionai de unu tema de importu: nci funt ancoras famìllias o personis disponìbilis a acolliri a piciocheddus chi tenint bisòngiu, fillus de famìllias chi funt bivendi unu tempus de prova o de strachìmini? S’Assistenti sotziali de su Comunu de Aristanis, Roberta De Blasi, at saludau a totus sterrendi su tema e torrendi gràtzias po sa pertecipatzioni manna.

Chi s’àtera borta chi ant fatu un atòbiu sìmbili ddoi fiant giai una bintina de personis, in custu atòbiu de duus sa genti fut a su dòpiu. Sinnu chi ddoi at medas interessaus a su tema. S’Assessori comunali de is Polìticas po is giòvunus, Antoni Frantzeschi, in su saludu suu at tocau su tema de s’agiudu chi ddoi fiat me in is bixinaus, me in is famìllias, me in is biddas o finas in sa tzitadi de innantis. Candu una famìllia teniat bisòngiu de agiudu, ndi ddoi fiat un’àtera pronta a ddu fai. Cussu spìritu de agiudu fiat sa manera de bivi e de fai bivi. Forsis oi custu spìritu s’est mesu pèrdiu e su pensamentu de unu no est a agiudai ma a stai mellus e seguru. Duncas, su Servìtziu sotziali tenit sèmpiri prus pregontas de agiudu.

Duncas, ant presentau su Programma PIPPI: unu programma chi est in usu in binti regionis italianas, in medas provìntzias e tenit impari prus de deximilla famìllias. A ita serbit? Is telegiornalis, finas in custu ùrtimu annu cun sa faina de sa Famìllia de su padenti, s’ant fatu pensai a unu Servìtziu sotziali prontu a ndi bogai a is pipius de is famìllias innui funt nàscius. Ma no est diaici. Custu progetu serbit pròpriu po agiudai a is famìllias chi tenint problemas a tenni a is fillus, a ddus podi castiai candu andant a traballai, a ddis fai fai cussu chi est deretu insoru. Duncas, cun custu progetu si circant famìllias chi donat disponibilidadi a podi castiai a is pipius po una dii, po unu merii, po unu mangianu o po una pariga de diis, candu su babbu o sa mamma naturali no podint. Est unu servìtziu de coru.

Dotora Sìlvia Còngiu, chi ghiat su Plus chi sighit sa faina de is afidus e is adotzionis, at nau chi unu servìtziu de acasàgiu ddu podint fai totus: cojaus, bagadius e bagadias, sposus chi bivint in sa pròpriu domu sena de essi cojaus… Po s’afidu e s’adozioni tocat a essi cojaus giai de annus, ma po arriciri in domu a calincunu pipiu chi non benit bogau de sa famìllia sua, ma ndi tenit un àtera chi dd’agiudat, ddu podint fai totus. Tocat a telefonai a su Tzentru su mèrcuris e sa cenàbura (324/0812991) e pediri novas.

Su Plus de Aristanis tenit giai una dusina de famìllias chi ant fatu custu caminu e funt prontas a arriciri piciocheddus. Sennora Adriana at donau sa testimonia sua e at nau chi at giai tentu in domu a duus piciocheddus, agiundendi una mamma sola cun tres fillus chi, po andai a traballai, no podiat abarrai cun issus e duncas Adriana est una tzia noa chi fait beni a su pipiu e a totu sa famìllia. Donniunu podit donai disponibilidadi finas de su pagu tempus e fai una cosa bella. Chi est una cosa bella a tenni fillus, est bellu puru a tenni fillus de ànima, de agiudai cun coru e bonucoru.

* di Michele Antonio Corona

E' questo il tempo giusto per abbonarsi a L'ARBORENSE

Il giornale direttamente a casa tutte le settimane.

Scopri come fare

Tweet

Leggi anche

Spotify: un servizio musicale digitale sempre in crescita

Fake news: imbrogli e bugie

Disabilità e Sport: tante norme per tutelare un diritto di t

N@vigando: Il digital divide

Con il numero 29 ripartono le nostre pubblicazioni cartacee

Il viaggio in Perù: Don Maurizio racconta l'intensa esperien

L'emozione di Mons. Carboni nell'incontrare la comunità sicu

Celebrato il 25mo anniversario dell'ordinazione di mons. Rob

L'OFTAL accompagna 80 persone con disabilità in pellegrinagg

Giubileo dei Giovani: l'intervista a don Marco Ruggiu

Campo scuola a Belvì: un'esperienza indimenticabile per 32 r

Riflessione. Tempo del Creato 2025

L'editoriale del 13 Luglio 2025. Sacerdoti: uomini, non supe

Il dramma della guerra in Ucraina: l'esperienza di don Ignaz

Fine vita: siamo padroni della nostra vita?

Intelligenza artificiale: la posizione di Leone XIV

L'ex carcere di Piazza Manno: un edificio da riqualificare

E' arrivata l'estate: necessario idratarsi con cura

Desulo. Il restauro del simulacro dell'Assunta dell'artista

Il ricordo di Bernardo Zizi, cantore di storia, fede e vita

Load More...