• #L'Arborense
• #ArcidiocesidiOristano
• #inlimba
• #Sardo
• #Imprentas
• #AntoniNàtziuGarau

40 annos de amigàntzia bella e sotzialidade faghende cultura

S’Unitre de Aristanis afestat is primos 40 annos de fainas. S’assòtziu, chi tenet sa sea sua in pratza de is Boes e chi contat sa bellesa de 963 iscritos pro s’annu acadèmicu 2025/2026, at dedicadu custa chida passada a regordare custu anniveràriu de importu. Comente? Faghende su chi faghet dae semper, est a nàrrere cuncordende una filera de addòbios, mustras, laboratòrios (sunt prus de 60 cussos fatos), cunvegnos e cunferèntzias, seminàrios, biàgios e bìsitas acumpangiadas, cuntzertos, rapresentatziones teatrales e, pro s’ocasione, fintzas cun una chena.

Lunis 25 de maju, in sa Pinacoteca comunale, ant abertu sa mustra e is laboratòrios de tzeràmica, cosìngiu criadore, fotografia cun su telefoneddu, màllia e pintura. Sa mustra faghet a dda bisitare fintzas a domìnigu 31 de maju. Sa die in fatu, in is locales de su Mutuo Soccorso de bia de Solferino, est tocadu a is dischentes de is laboratòrios de baddu sardu, baddos in cambarada, càntigu corale, chiterra, teatru italianu. Mèrcuris 27, in su Teatru Antoni Garau, ddoe ant cuncordadu su cunvegnu intituladu 40 annos de cultura e sotzialidade.

Su valore de s’Unitre, unu tema sentidu meda pro ite ca resumit, in duos faeddos, sa chi est sa punna prus de importu de s’Unitre aristanesa e de totu is Universidades de sa de Tres Edades e de is Tres Edades de Itàlia: su de fàghere addobiare sa gente cun cunvegnos, biàgios, bìsitas acumpangiadas, laboratòrios e unu muntone de àteras fainas, fungudende chistiones culturales. Intra de is relatadores ddoe fiant prof.re Paolo Putzu, chi at faeddadu de Mens sana in corpore sano?

Sa gerontologia respondet, e prof.re Antonio Ignazio Desogus, chi at isboligadu una relata in contu de Sa rivolutzione de sa longevidade. Sa die, a meritzeddu, est acabbada cun unu cuntzertu de Piero Marras cun su pianoforte. Giòbia 28, imbetzes, semper in su Teatru Garau, is dischentes de teatru sardu ant presentadu Sonnu trumbulladu, una de is cummèdias prus de importu de s’iscritore aristanesu mortu in su 1988 e chi dd’ant intituladu su locale de bia de Parpaglia. Sa regia fiat de Tonino Romanelli. Ma sa chidada de festa est acabbada chenàbura 29 cun sa chena sotziale, in pratza de Manno.

Si cumprendet, duncas, su presu mannu espressadu dae sa presidente, Adriana Boy, acostagiada in su Consìgiu diretivu dae un’iscuadra de voluntàrias e voluntàrios formada dae Antonello Montixi (vitzepresidente), Virginia Tatti e Stefania Muscas (diretoras de is cursos), Antonio Orrù (tesoreri), Antonello Mantione, Caterina Cossu e Andreina Sanna (in sa segreteria) e Gino Carcangiu (consigieri).

In Sardigna nche sunt unas barantina de Unitre. A prus de sa cuota de iscritzione de is sòtzios, is Unitre gosant de unu contributu dae parte de sa Regione Sarda: pro custu annu acadèmicu fiat de pagu prus de unu millione de èuros e, de custos, 57.215 sunt tocados a s’Unitre de Aristanis, ponende paris sa parte uguale pro totus e sa parte assignada a tenore de su nùmeru de iscritos.

Sunt medas e diferentes is fainas e is argumentos pigados in cunsideru in is cursos incarrerados: dae sa stòria a sa geologia, dae sa literadura a is temas ambientales-naturalìsticos e a cussos de s’enogastronomia e de sa mùsica, ligados – pro su prus – a s’identidade culturale de sa Sardigna. E est pro cussu chi in is annos passados s’Unitre de Aristanis at cuncordadu laboratòrios dedicados fintzas a sa poesia in limba sarda e a cussas formas de espressada poètica de su Campidanu de Aristanis, comente a s’arrepentina e su mutetu.

Ma ocannu si sunt fatos cursos in contu de s’archeologia de is paesàgios oru-oru de mare, de baddu e de cantu, de informàtica, de limbas (inglesu, frantzesu, ispanniolu, tedescu e arabu), de yoga e de orienteering, de coltivu de s’olia e pro imparare a tastare e a apretziare s’ògiu ermanu cun s’analizu sensoriale, de pudadura e de psicologia, de teatru e de chiterra, de cosìngiu e de màllia, de istèrgiu de terra e de tzeràmica, pro nde remonare unos cantos. Ma s’Unitre de Aristanis est avesa a abèrrere fintzas fentanas cara a su mundu, cun fungudamentos comente a cussu chi ocannu at permìtidu de connòschere mègius sa cultura arabu-islàmica.

Sa Redatzione de L’Arborense espressat is norabonas a custu assòtziu de promovimentu sotziale impignadu in s’abbiatzamentu e in sa connoschèntzia de sa cultura nostra, cun s’augùriu de sighire ancoras pro annos meda in su surcu incarreradu.

* di Antoni Nàtziu Garau

E' questo il tempo giusto per abbonarsi a L'ARBORENSE

Il giornale direttamente a casa tutte le settimane.

Scopri come fare

Tweet

Leggi anche

Spotify: un servizio musicale digitale sempre in crescita

Fake news: imbrogli e bugie

Disabilità e Sport: tante norme per tutelare un diritto di t

N@vigando: Il digital divide

Con il numero 29 ripartono le nostre pubblicazioni cartacee

Il viaggio in Perù: Don Maurizio racconta l'intensa esperien

L'emozione di Mons. Carboni nell'incontrare la comunità sicu

Celebrato il 25mo anniversario dell'ordinazione di mons. Rob

L'OFTAL accompagna 80 persone con disabilità in pellegrinagg

Giubileo dei Giovani: l'intervista a don Marco Ruggiu

Campo scuola a Belvì: un'esperienza indimenticabile per 32 r

Riflessione. Tempo del Creato 2025

L'editoriale del 13 Luglio 2025. Sacerdoti: uomini, non supe

Il dramma della guerra in Ucraina: l'esperienza di don Ignaz

Fine vita: siamo padroni della nostra vita?

Intelligenza artificiale: la posizione di Leone XIV

L'ex carcere di Piazza Manno: un edificio da riqualificare

E' arrivata l'estate: necessario idratarsi con cura

Desulo. Il restauro del simulacro dell'Assunta dell'artista

Il ricordo di Bernardo Zizi, cantore di storia, fede e vita

Load More...