- Dettagli
- Domenica, 01 Marzo 2026 17:49
- Scritto da Redazione
Abbasanta. S’Universidadi de is Tres Edadis est sighendi unu cursu in contu de is religionis
De su mesi de ladàmini finsas a cussu de maju, s’Unitre de Abbasanta at promòviu e est sighendi unu cursu de stùdiu in contu de is religionis. Giai de candu fiat presidenti sa spaciada de Nina Dessì, stimada e arregordada cun coru de totus, ddoi fiat su cursu bìblicu. Issa etotu iat cumentzau a ligi sa Bìbbia cun is personis chi partecipaiant agiumai binti annus a oi e spiegàt su chi ddoi fiat scritu.
Sa curiosidadi fiat meda e, mancai fessit fèmina de fidi e cunsacrada a sa spiritualidadi de don Bosco, sa letura fiat làica, sena de obrigai a nemus a crei chi cussu fiat Fueddu de Deus. Candu m’iat tzerriau po dd’arremprasai, poita sa maladia dd’iat lassada a letu, m’iat nau: Tui ligi sa Bìbbia cun custa brava genti, chi disìgiat unu fueddu de consolu, ma no fetzas mai dutrina, poita s’Unitre no depit tenni punna polìtica, religiosa e ideològica. Nosu depeus afortiai su sentidu de umanidadi imparendi-ddis cultura, arti e bellesa.
E cun cussa arrecumandìtzia una trupixedda de una cuindixina de personis si funt atobiadas assumancu una borta a su mesi po ligi, ascurtai, batallai asusu de una pagina de sa Bìbbia finsas a maju de s’annu passau. Ocannu, invècias, est cumentzada sa faina bella no sceti de cumprendi su chi, asusu de sa Bìbbia, narant ebreus e cristianus, ma finsas su chi creint islamicus e buddistas. In gennàrgiu, professori Antoni Chessa, giai professori de religioni me in is scolas superioris de Aristanis e de Teologia in s’Istitutu de sa diòcesi nosta, at tentu duas letzionis asusu de sa religioni: ita est, cali fundamentu tenit, cali funt is significus chi tenit po chini creit e cali dudas ponit a chini no creit…
Duas letzionis in contu de sa fenomenologia de sa religioni. E is pregontas funt stètias medas. Me in is ùrtimus mesis de s’annu passau est stètiu professori Alèssiu Pinna a ai presentau sa religioni mussulmana. Specializau in su PISAI (Pontifìciu Istitutu de Stùdius Arabus e Islàmicus), est scritori e professori in logus meda e mascamenti in s’Istitutu Unikoinè de Aristanis.
Po su giornali nostu iat contivigiau una bintina de artìculus, spieghendi fueddu cun fueddu s’Islam e de ingunis nd’est nàsciu unu libru. Is cuatru letzionis chi at tentu in Abbasanta funt stètias de fundamentu e ant permìtiu a chini at sighiu de cumprendi mellus s’Islam. Ddoi iat a essi bòfiu unu cursu interu, ma cun sa cumpetèntzia de professori Pinna meda s’est cumprèndiu.
De pagus lunis est cumentzada sa filera de letzionis asusu de su buddismu. Dotori Simoni Luca Fais est aberendi sa bellesa de cussa manera de bivi e de intendi sa vida. Custus atòbius no serbint po cumbinci cara a cussa religioni o po nai chi una est mellus de s’àtera, ma po ddas studiai, cumprendi mellus e tenni su sabori po sighiri a ddas ligi cun spìritu fungudu.
Candu una cosa no si sciit, si pensat chi siat de pagu contu, ma prus si stùdiat, prus si stuvulat e si tenint dudas e pregontas. Duncas, tocat a torrai gràtzias a cussas prus de cuìndixi personis chi frecuentant su cursu de religioni e chi bolint sciri. In totus is cursus, is iscritus ocannu funt 215 personis chi benint de Abbasanta, Ilartzi, Norghiddo, Bòrore, Paulle, Otzana, Sèdilo, Bonàrcadu, Austis e Neoneli.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
Foto copertina dal sito peranziani.it
E' questo il tempo giusto per abbonarsi a L'ARBORENSE
Il giornale direttamente a casa tutte le settimane.
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.