- Dettagli
- Venerdì, 13 Febbraio 2026 11:14
- Scritto da Redazione
Energia. S’istrategia e is cumpetèntzias trobidas de sa Sardigna
Nche at a resèssere sa Regione Sardigna a fàghere bàlere in dae in antis de s’Istadu is cumpetèntzias suas in matèria de urbanìstica e amparu de s’ambiente e de su paesàgiu? O at ant a bìnchere is inditos fortes de s’Unione Europea e de su Guvernu italianu de autorizare s’afracada de is aprofitadores energèticos chi nde bolent prenare de palas eòlicas e de pannellos fotovoltàicos montes, serras e campuras de s’Ìsula nostra, fintzas a pagu tretu dae benes archeològicos, istòricos e identitàrios?
Custa est sa pregonta chi in medas, chenàbura 6 de freàrgiu, si-nch’ant portadu a domo, a pustis de àere ascurtadu cun atentu mannu a is relatadores de s’addòbiu Istrategia energètica de sa Sardigna, cuncordadu dae una cambarada de 13 assòtzios (MEIC, Domus Oristano, Oristano & Oltre, Movimento dei Focolari, 50&PIÙ, Cittadinanza Attiva, Acli Oristano APS, Associazione Nazionale dei Vigili del Fuoco, CIF, M.A.S.C.I., Associazione Regionale Ex Esposti Amianto, Adiconsum, Associazione Culturale Lucio Abis), cun su patrotzìniu de sa Provìntzia de Aristanis e de su Comune de Aristanis. A pustis de s’istèrrida de Giampiero Vargiu, ingegneri e espertu de energia, de sa chistione nd’ant faeddadu Alfonso Damiano (professore de su Dipartimentu de Ingegneria elètrica e eletrònica de s’Universidade de Casteddu), Guido Sanna (ingegneri espertu de energia de sa sotziedade INIOS de Aristanis), Giovanni Coinu (professore de su Dipartimentu de Giurisprudèntzia de s’Universidade de Casteddu) e Emanuele Cani (assessore regionale de s’Indùstria).
S’addòbiu est istadu s’ocasione pro faeddare de su tramudu energèticu e de su tempus benidore de s’Ìsula, intra de isfidas globales, oportunidades locales, respetu de s’ambiente a livellu mundiale (pro more de is bogaduras incuinadoras chi mudant su clima), amparu de sa salude, respetu de su paesàgiu in ue bivimus, cumpetitividade de is impresas, calidade de sa vida e economia familiare, pro ite ca sa bulleta pro sa currente o pro su gas est semper prus cara. Est una chistione, duncas, de isvilupu econòmicu ma in su surcu de sa sustenibilidade ambientale. Pro custu, oe, su tramudu energèticu est un’atu de istima cara a sa terra nostra, un’acòrdiu intra de generatziones, sa promissa de lassare a fìgios nostros una Sardigna prus pulida, prus giusta, prus autònoma, ant naradu is organizadores.
Alfonso Damiano at fatu un’analizu a fine de su cuntestu energèticu de s’Ìsula nostra, faeddende cun datos ufitziales de comente e de in ue si produet oe in die s’energia in Sardigna, de canta si nde produet, de canta nos nde serbit pro is bisòngios de s’indùstria e de is àteras fainas produsidoras, de is trasportos e de is domos nostras. Guido Sanna at faeddadu de is oportunidades bellas chi oferint is CER, is comunidades energèticas annoàbiles, chi ponent paris is produsidores dae fontes annoàbiles e is consumadores de energia; a dolu mannu in Sardigna sunt ancoras pagas, tropu pagas! Ma est Giovanni Coinu chi, cun craresa manna, nd’at fatu essire a campu s’intritzu treuladu intra de normas europeas, istatales e regionales, cun interventos fintzas de sa Corte Costitutzionale, in ue is cumpetèntzias de sa Regione Sarda in contu de sa chistione de seberare su logu in ue is impiantos si podent fàghere o nono e de chie ddos autorizat nde resurtant apetigadas e iscrefadas a suta de su tzentralismu istatale. Ddu detzidet s’Istadu in ue e comente ddos autorizare! Is amministratziones locales e fintzas sa Regione no tenent rolu perunu.
E, in s’interis, sa proposta de lege Pratobello intrat a manera ufitziale in s’agenda de su Consìgiu Regionale de sa Sardigna, forte de 211 mìgia firmas de tzitadinos sardos pistighingiados pro sa sorte de su paesàgiu e de sa butzaca issoro e de un’esèrtzitu de sìndigos inchietos, pro ite ca is determinos in contu de custa afracada – chi pro comente si presentat est fata prus pro incungiare dinari chi no pro prodùere energia pulida – ddos pigant in Roma, sena de carculare is comunidades locales. Ite pees nd’amus a bogare cun totu custu trèulu de normas tzentralìsticas chi allupant sa (pagu) autonomia chi pensaiamus de àere? Si si cunfirmat custa punna in is relatas intra de Istadu e Regione, s’iscenàriu chi sunt cumentzende a pintare in Roma est su de unu degòlliu de su paesàgiu de sa Sardigna, de un’ofesa a is prendas archeològicas, istòricas e naturalìsticas de sa terra nostra, sena de profetu perunu pro is Sardos e pro is butzacas issoro.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Antoni Nàtziu Garau
E' questo il tempo giusto per abbonarsi a L'ARBORENSE
Il giornale direttamente a casa tutte le settimane.
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.