- Dettagli
- Domenica, 01 Febbraio 2026 11:15
- Scritto da Redazione
Crèsia. Est acabada su 25 de gennàrgiu sa Cida de oratzioni po s’unidadi de is cristianus
Est prus de centu annus chi custa faina fait ponni impari a is cristianus de totu su mundu. Giai in su milliesetixentus me in is comunidadis protestantis si cumentzat a pregai po arrennesci a si fueddai tra protestantis e catòlicus.
Custu acontessit me in is Stadus de su Cabu de Susu de s’Europa, innui is duas cunfessionis cristianas bivint acanta. Prus pagu si faiat in Frància, Spànnia e Itàlia chi sunt acapiadas a sa Crèsia de Roma. In su 1867 is pìscamus anglicanus si riunint impari cun sa punna de pregai po su chi Gesugristu iat pediu a is discèpulus suus innantis de sa morti: su de essi unius comenti a issu e su Babbu suu.
In su 1894, paba Lioni su de Trexi pensat de fai cussa cida de oratzioni acanta de sa Pasca de su Spìridu Santu (Pentecoste) po fai a cumprendi mellus su chi su Spìridu iat giai fatu in su Cenàculu in Gerusalemmi cincuanta diis apustis chi Gesùs fiat arresuscitau de is mortus. Finas is ortodossus s’impinniant po cussa faina e a su cumentzu de su Noixentus su patriarca de Costantinòpoli, Jacu de Tres, scriit una litera de importu po pediri a totus de fai impari cussa oratzioni.
Est in su 1908 chi su predi protestanti Paul Watson in New York pigat sa detèrmina de dda fai de su dexeotu a su binticincu de gennàrgiu. Duas diis acapiadas a forti cun is santus apòstulus: su dexeotu est sa festa de sa Cadrea de santu Pedru e su binticincu sa festa de sa Cunversioni de santu Pàulu. Duncas, a ocannu, funt centuedexeotu annus chi si fait cussa oratzioni in otu diis, chi a bellu a bellu de New York s’est spartzinada in totus is Crèsias.
Ma est in su 1935 chi, in Frància, s’abati Paul Courtier a cussa faina ddi ponit su nòmini chi ancoras oi tenit in totu su mundu de Cida universali de oratzioni po s’unidadi de totu is cristianus. Ma finas a su 1958 dònnia crèsia o comunidadi dda cuncordat a manera sua.
De cussu annu, invècias, catòlicus e protestantis dd’aparìciant impari faendi unu billetu e pensendi a calincunu sinnu de fai in s’interis de is celebratzionis. No podeus scaresci cantu importu at tentu in custa faina su Movimentu ecumènicu, chi at traballau e scritu po uniri a totus.
Dònnia annu si pigat unu tema de sa Bìbbia e, pruschetotu, de su Vangelu. Ocannu su tema fiat Unu sceti est su corpus, unu sceti est su Spìridu, comenti una sceti est sa spera chi Deus s’at tzerriau de circai. Cussa Cida no est comenti a una novena po santus o a is tres diis innantis de una festa, ma est meda de prus poita si fait bivi su chi at cumandau su Vangelu: a essi unu, comenti at pregau totu sa vida sa durgalesa Maria Gabriella Sagheddu.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' questo il tempo giusto per abbonarsi a L'ARBORENSE
Il giornale direttamente a casa tutte le settimane.
Leggi anche
Focus
Le edicole chiudono: si legge di meno?
Europa: la nuova Carta d'Identità Elettronica diventa obbligatoria
Jeans e Made in Italy: un'iniziativa per tutelare le eccellenze di marchio italiano
Il Bar di Ibba: un edificio identitario per Oristano
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
Incontri
Il romanzo di Massimiliano Perlato ambientato a Marceddì: intrigante e ben confezionato
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.