- Dettagli
- Domenica, 04 Febbraio 2024 12:16
- Scritto da Redazione
Libru Biaitu 2022: publicau de s’Agentzia de is Doganas e de su Monopòliu de su Stadu
Nci funt chistionis chi lassant sèmpiri allucaus a chini ddas ascurtat. A mei m’ant alluinau is nùmerus chi apu lìgiu in su giornali de sa diòtzesi de Igrèsias in contu de su giogu de su lotu e de su dinai chi genti meda, sèmpiri de prus, nci ghetat in circa de fortuna. Sa giornalista, Annalisa Atzei, s’at abertu e amostau cantu dinai s’est spèndiu, bintu e arregortu in s’annu 2022 cumentzendi de su Libru Biaitu.
Prima de totu tocat a nai una cosa chi fai tremi: sceti de scumissas fatas a mori de lei, superenalotu, scrafi e binci, machineddas papadinai, poker e scumissas de sport si funt giogaus 136 milliardus de èurus! Non seus chistionendi de cuatru arrialis ni de nuxedda, ma de milliardus de èurus! In prus tocat a aciungi 73 milliardus de giogus e scumissas chi si podint fai in sa retza cun su telefoneddu o cun su computer e atrus 33 de cussas scumissas chi su Stadu at proibiu, ma si faint etotu.
Duncas seus a 242 milliardus de èurus. Po tenni assimbillu de nùmeru in sa spesa italiana, tocat a pensai chi in su pròpiu annu nd’eus spèndiu 160 po papai (màndigus), 128 po sa saludi e sceti 52 po sa scola. Totu custu dinai distinau a su giogu est paris a su 7 % de cussu chi connosceus comenti a PIL natzionali.
Sa spesa prus manna est cussa de is billetus de su scrafi e binci (giai po totus est scrafi e perdi!), sighia de su giogu de su lotu (cussu chi ddi narant Super) e de is scumissas acapiadas a su sport (bòcia, cuaddus, motoris, tennis…). Invècias, su giogu in sa retza est prus faina de giòvunus (medas tenint prus pagu de dexiotu annus), crescendi in doxi mesis de su 9 %. Su giogu chi si fait de prus est cussu de cupas, bastus e orus. Non tocat a si-ndi scaresci totus cussas machineddas chi si biint me in is tzilleris: ddoi est sèmpiri calicunu chi ghetat dinai aintru comenti e chi fessit seminendi.
Su prus no ndi torrat nudda a busciaca. Ma, chi acontessit chi bincit calicuna cosa, ddu torrat a ghetai aintru cun sa spera de fai cresci sa fortuna. In sa simana de sa pandemia is nùmerus de giogadas funt calaus de meda, poita no si podiat bessiri; ma de su 2021 a su 2022 sa genti chi at giogau cun cussas cascitas papadinai est crèscia de su 85 %. In Sardigna eus tramudau de 900 millionis de èurus in su 2021 a pagu prus de unu milliardu in s’annu infatu e a agiumai unu milliardu e cuatruxentumillionis in su 2022.
Ma chini si ghetat a cussus giogus? Genti chene valori perunu? Imbriagonis? Opuru òminis solus chi no sciint comenti nci passai sa dii? No! Giogant mascus e fèminas, giòvunus e bècius, genti pòbera o chi tenit traballu e bonu stipèndiu, genti cun famìllia e cun pipius de nudriai. Giogant cun sa spera de binci e sistemai sa famìllia? Forsis.
Chini no tenit meda dinai giogat po ndi fai; chini ndi tenit, po ddu fai cresci; ma chini nci guadangiat in totu custu? Su Stadu! Tocat a ddu nai in craru. Difatis in su 2022 a su Stadu (s’Eràriu) dd’at intrau a busciaca su 33 % in prus de s’annu 2022: paris a 70 milliardus de èurus.
Una nova de pagu diis chi fait tremmi est chi ant passau s’Organismu po su controllu de sa dipendèntzia de su giogu de su Ministeru de sa Saludi a cussu de sa Finàntzia e de s’Economia. Scriit Atzei unu càmbiu chi amostat comenti su printzìpiu no siat sa saludi de sa genti, ma su dinai chi intrat a su Stadu de cussa faina.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.