- Dettagli
- Domenica, 18 Febbraio 2024 12:07
- Scritto da Redazione
Traballu. Me in is spidalis de su Giaponi si podint fai finas 1600 oras in prus
Oi seus sèmpiri de prus imbitzaus a nai ca sa genti no bolit traballai e ca medas funt tocaus de una mandronia manna. Is prus mannus narant ca is giòvunus non tenint gana mancu de abarrai stantàrgius. Calincunu est arribau a nai puru ca seus connoscendi una genia de corcaus e sètzius: de su letu a sa cadira e a s’imbressi.
Ma sa beridadi no est cussa sceti: nci at ancoras genti chi morit de traballu! Dd’eus intèndiu bortas medas de cussus piciocus chi traballant in sa parti bàscia de s’Itàlia arregollendi tomata o aràngiu o àtera fruta. Dd’eus intèndiu de maistus de muru chi nd’arruint de cobertura. Dd’eus intèndiu de babbus de famìllia chi, stracus po is tropus biàgius cun àutobus o autotrenus, morint in s’arruga. Dd’eus intèndiu puru de òminis in edadi chi andant a su sartu e morint po curpa de unu tratoreddu. Funt medas, duncas, is chi crepant po traballu.
Ocannu passau finas in Giaponi est acontèssiu de giòvunus chi funt mortus o si funt bòcius po su traballu meda. In su mesi de maju de su duamilla e bintiduus unu dotori giovuneddu s’est bociu a manus suas etotu po su strachìmini de is oras fatas in su spidali. No est meda de prus de nosu in Itàlia su straordinàriu chi si traballat in Giaponi: trinta oras a su mesi po totus is traballus.
Ma su Guvernu at detzìdiu chi me in is spidalis si podint fai finas a milliotuxentusessanta oras in prus: cincu oras in prus dònnia dii, centucincuanta a su mesi. Custu dotoreddu, su mesi in antis de si bociri, iat fatu prus de duxentus oras de traballu in prus: agiumai seti oras a sa dii in prus!
Sa mamma si ndi fiat sapia chi su fillu non istàt beni e chi in domu fiat lassendi arrefudus in mesu a is aposentus: unu piciocu chi nci teniat a su limpiori e a s’òrdini.
Eus intèndiu ca finas in Roma sa polìtica, chi cumandat, at postu dinai po totus cussus dotoris chi bolint e podint fai oras in prus. Ma ita conca ant a portai apustis de dexi, doxi, trexi oras in una dii e po cincu o ses diis a sa cida? Non ant a essi stracus, sbentiaus, pagu abillus candu bisitant a is malàdius?
De su Sudàfrica s’arribat una nova chi si lassat spantaus: ant imbentau una de cuddas app chi serbint po fai traballai a is fèminas acordadas. In su duamilla e catòdixi una sotziedadi de traballu at incingiau s’app SweepSouth, po agiudai a totus cussas fèminas chi allichidint me in is domus allenas.
Me in is primus tempus su traballu andàt beni po traballadoras e po meris. Narat Chistolina Ndloyu – chi de cincu annus est traballendi cun cussa manera – chi nci arrenesciat a torrai a domu sua a pustis pràndiu e podiat tenni dònnia mesi unu bellu muntoneddu de dinai. Candu traballàt a sola ddi tocat a curri totu sa dii e su dinai non bastàt mai.
Duncas, fiat prexiada meda de cussa app. Ma apustis de pagu tempus, is meris ant cumentzau a ddi preguntai oras e fainas in prus e issa no si podiat arreusai de ddu fai. Comenti a cussa fèmina, aici medas o totus. Apu pèrdiu su contu de totus is bortas chi is meris m’ant obligau a traballai oras in prus e a fai traballus chi no mi pertoncànt. E ita podiu fai? Sa sienda meri de s’app, non m’amparàt nudda, narat Chistolina.
E in su Paisu nostu, no nci funt meris chi òbligant a traballai oras in prus po sighiri su cuntratu? E totu chene sa scusa de s’app!
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Le edicole chiudono: si legge di meno?
Europa: la nuova Carta d'Identità Elettronica diventa obbligatoria
Jeans e Made in Italy: un'iniziativa per tutelare le eccellenze di marchio italiano
Il Bar di Ibba: un edificio identitario per Oristano
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
Incontri
Il romanzo di Massimiliano Perlato ambientato a Marceddì: intrigante e ben confezionato
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.