- Dettagli
- Domenica, 28 Aprile 2024 11:37
- Scritto da Redazione
Crescit s’arroba giai imperada chi comporaus me in is giassus de sa retza
Est crescendi dònnia annu sa genti chi còmporat bestimenta giai imperada de àterus. Stùdius a mesura mundiali ant decrarau chi de su 2020, candu seus abarraus incriaus in domu po sa Covid-19, is giassus de arroba giai imperada ant bèndiu su 275 % in prus de su tempus in antis. Su giassu chi est crèsciu meda est Wallapop, nàsciu in su 2015 in Bartzellona e spartzinau in totu su mundu pròpiu in su tempus de sa Covid-19.
In su 2022 no sceti si podiat intrai a sa retza e circai su bestiri in su giassu de cussa sienda, ma at fatu a ndi scarrigai s’app in su telefoneddu, po podi comporai prus a discansu. In doxi mesis ndi-dd’ant scarrigada duus millionis e mesu de personis, diventendi s’app de bèndida de arroba prus manna de su mundu. Ma poita totu custu?
S’idea est stètia cussa de fai girai s’arroba bècia (vintage) po circai de sparanniai currenti e de no fai tropu dannu a su mundu. Acanta ddoi est puru sa tarea de fai girai is bestiris po avalorai sa manera de si bestiri de is annus in antis. Bastit a pensai a is cartzonis a pei de elefanti: ddus imperàt babbu miu in su Setanta e pagus annus a oi apu biu giovaneddus bistius aici.
Finas a trinta annus a oi medas arriciant de fradilis e sorrestas prus mannus s’arroba chi no ddis beniat prus. Deu seu unu de cussus chi at bistiu sèmpiri arroba de àterus e seu crèsciu etotu, mancai sena de firmas nodidas o bestiris de siendas mannas. Epuru, giai de candu fia piticu nci fiat chini si nd’arriiat de cussa faina. E no amancat unu pagheddu de bregùngia e de fèngia po chini si podiat permiti bestiris nous e a sa moda.
Oi, invècias, si mesurat chi su 41 % de chini còmporat arroba in sa retza incumentzat circhendi cussa giai imperada de àterus. De custu 41 %, agiumai sa metadi (46 %) est de piciocheddus chi funt nàscius a pustis de su 2000. Thredup, chi est unu de is bendidoris prus mannus de arroba bècia, at nau chi in su 2025 at a cresci ancora de su 10 % cussu cummèrtziu.
De seguru chini bendit ddu fait pruschetotu po nci guadangiai e po ghetai dinai a buciaca; ma, in prus, ddoi est sa punna de no preni su mundu de arroba bècia chi arribat a is Stadus prus pòberus de s’Àfrica faendi cresci s’àliga. In su 2023 Changing Markets Foundation at decrarau chi unu millioni de bèstiris fatus de plàstica chi no si podint arrangiai o torrai a imperai in Itàlia nci-ddus mandaus a su Kènya, faendi cresci s’àliga e s’incuinamentu.
Cussa arroba arribat a ingunis, dda bendint a pagu prètziu a is bendidoris, chi dda sceberant e ndi bendint una parti pitica me in is arrugas e s’àtera nci-dda ghetant a is muntonàrgius e no pagu arribat a mari. E cussu millioni est sceti de s’Itàlia! Pensaus a cantu ant a essi is Stadus chi faint custa faina de caridadi manna, mandendi arroba a s’Àfrica. E tocat a nai puru chi no est arroba sciacuada e prenciada.
No amancant bestiris brutus, segaus. No parit bregùngia, ma est bregùngia! Finas me in is logus chi pigant arroba po caridadi, iat a tocai a cumprendi cantu de cussa arroba est sciacuada e prenciada! E custu acontessit finas me in logus acanta de domu chi pigant arroba bècia po dda donai a is pòburus: candu nci dda portaus a ingunis, sciacuada o arrangiada dd’eus? A bortas no nci arrennesceus a scerai su chi est de donai e cussu chi est de scavulai.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.