- Dettagli
- Domenica, 12 Maggio 2024 11:30
- Scritto da Redazione
Monumentus abertus. Sa prima borta de Nurachi est stètia una faina bella meda
Est arribada po Nurachi puru sa prima borta de Monumentus abertus. Sàbudu cuatru e domìnigu cincu de maju prus de cincuanta piciocheddus de is scolas mèdias e cussus de sa classi de cincu de is scolas elementaris ant arriciu a is bisitadoris nurachesus e de foras chi ant prenu sa bidda. Sceti su domìnigu funt stètias agiumai cincuxentus is personis chi ant prenotau sa bìsita a trenixeddu o a pei in s’òasi de Pischeredda.
Nùmerus chi narant su traballu mannu fatu de totus cussus chi ant organizau is duas diis. In prus si depint contai totus cussus chi ant abisitau is logus de importu, ma no ant prenotau ni si funt firmaus a ponni una firma in is arregistrus. Duncas, tocat a nai chi est andada beni meda, comenti at nau chini finas a su merii a tardu at traballau po chi totu fessit fatu beni. In pratza de crèsia, pruschetotu su domìnigu – ma finas su sàbudu –, funt stètias medas is possibilidadis de giogu e de mùsica po is prus piticheddus.
Is pipius ant arrìsiu, giogau, ant pòtziu curri, baddai. Una manera de fai a cumprendi, finas a is prus piticheddus, ca sa cultura e sa bellesa de is logus si podit bivi cun prexu. Turistas de is biddas acanta, de sa provìntiza de Aristanis, ma finas de Casteddu e de biddas e tzitadis atesu.
Custu si narat ca sa publicidadi chi si spartzinat in sa retza e in sa televisioni serbit meda po fai a connosci a totus custas fainas bellas. Si podiat abisitai sa crèsia de santu Giuanni. Unus cantus piciocheddus de is scolas mèdias ant fatu unu traballu mannu, donendi spiegatzionis in contu de sa stòria de su fàbbricu, de su santu e de is stàtuas, de is scavus archeològicus chi si podint biri.
A sa manera de is piciocheddus, ma cun d-unu stùdiu mannu fatu in scola in is oras de su meigama. Arribaus a su merì a pustis de s’oràriu de serrai, is piciocheddus fiant ancora ingunis po arriciri a cussa genti chi torràt a pei de s’òasi de Pischeredda. Difatis, funt stètius aici medas cussus chi ant chèrfiu biri sa turri de su stàini e si nci-apicheddai asusu, chi ant dèpiu fai puru tròporas de genti chi at fatu cussus cincus chilòmetrus po andada e torrada a pei.
Cussa òasi est unu logu bellu meda po connosci su traballu de is piscadoris in su stagnu, po biri arratzas particualris de pillonis, finas cussus prontus a partiri po bolai cara a terras atesu. A intru de sa turri e in foras, donendi is spiegatzionis, una dexina de piciocheddus, finas de sa scola elementari. Una faina chi agiudat a cumprendi su traballu mannu chi faint maistus, professoris e scientis po avalorai is prendas de Nurachi.
S’àtera prenda chi si podiat abisitai sena de pagai unu soddu est stètiu su Museu Pepetto Pau. Una domu de sennoris chi teniant terras e benis, ma no ant tentu fillus.
Duncas, sa domu dd’ant torrada a nou e imoi est su logu po intendi sonus, biri, tocai e connosci is fainas antigas de sa bidda de Nurachi e de logus meda chi ant connotu su traballu de is massajus. Si podiant finas abisitai duas cantinas, cussa de sa famìllia Caddeu e s’àtera de sa famìllia Sardu.
Su binu est bellu, ma finas su logu est tentu cun amori e cun bellesa manna: murus de làdrini, coberturas a cannitzada e òrriu, tèulas antigas, e sena de arrigiolas in terra, comenti in tempus antigu. Brava Nurachi e bravus totus cussus chi ant fatu custa faina bella.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.