- Dettagli
- Domenica, 19 Maggio 2024 11:25
- Scritto da Redazione
Aristanis. Is scientis de is scolas e sa manera de spiegai stòria e arti
Chini at fatu una passillada in Aristanis in sa coa de cida, sàbudu ùndixi e domìnigu doxi de maju, at pòtziu biri una bellesa manna de genti me in is arrugas e pratzas. Comenti a dònnia annu, funt stètius medas cussus chi ant chèrfiu bisitai logus, crèsias, monumentus, museus e totu cussu chi ant abertu in tzitadi, in Turrimanna e in Donigala. E comenti a dònnia annu, e in su primu acabu de cida in Nurachi, a pigai sa parti de is Ciceronis funt stètius is piciocheddus de is scolas. Una tròpora de piciocheddus a camisedda bianca chi pariant formigheddas in su niu.
Comenti calicunu intràt, unu o duus arribànt a sa genna e ddi preguntànt chi boliant sa spiegatzioni de su logu, de is pinturas, de is stàtuas e de totu cussu chi ddoi fiat in su logu etotu. Ascurtendi-ddus, faiat praxeri a cumprendi mellus sa stòria e s’arti de su logu e donniunu de cussus teniat sa partixedda sua de nai. Candu est acontèssiu de fai calincuna pregunta, su piciocheddu chi teniaus ananti, naràt: Cussu si dd’at a nai su cumpàngiu miu, ca est cosa chi spiegat issu. Calincunu àteru, invècias, dònnia pagu fueddus naràt: Chi teneis preguntas, faei, ca seu innoi po cussu.
Duncas, mirendi is logus de importu chi, ocannu puru su Comunu e s’Assòtziu chi at organizau, ant abertu, mi seu spassiau ascurtendi e castiendi su chi faiant e narànt cussas ghias giòvunas. In su palàtziu de is Arcais funt arribadas in cincu o ses po s’arriciri in sa genna manna. Apustis de unu saludu bellu, s’ant acumpangiau asusu de una scalera longa e s’ant postu in manus de una piciochedda. In bàsciu ddoi fiat unu pianoforti e cussus piciocheddus faiant a turnu po ddu sonai, ca in sa scola de issus sa mùsica tenit parti manna.
Cussa ghia chistionàt in pressi e teniat una bellesa manna de paperis chi dd’agiudant a arremonai datas, nòminis e àterus informus. Su bellu fiat chi sa mùsica chi s’intendiat, su logu sena de mòbilis, su burdellu chi sa genti faiat chistionendi e sa manera lestra de nai de cussa ghia, no s’at permìtiu de cumprendi meda.
Ma issa fiat totu prexada de s’arti sua chi fiat lègiu a dda firmai o a ddi pregontai de arripiti. Me in su Grèmiu de santu Giusepi una piciochedda s’at fatu sa spiegatzioni sena de imperai mancu unu billeteddu: sciiat totu su chi tocàt a nai e no s’at lassau a nisciunu àteru cumpàngiu.
Ma in cussu caurtu de ora chi at chistionau e s’at fatu movi a ingìriu de sa mesa no at lassau unu segundu de castiai a sa professoressa sua e pariat de essi in scola in s’interrogatzioni. In su palàtziu de is Campus – Colonna, apu pòtziu biri un’àtera scena. Candu seus arribaus, domìnigu a mangianu, fiat giai ora de serrai po prandi e genti meda boliat intrai po biri. Comenti in dònnia logu, s’ant arriciu e pregontau chi boliaus sa spiegatzioni. Aici una piciochedda s’at fatu firmai in sa scalera po si nai de cussus repertus archeològicus agataus in Tharros.
A palas de nosu nci-fiant una pariga de personis e issa pregontàt: Sa spiegazioni boleis? E cuddus, sena de nimancu si furriai, nci-passant deretus. Sa faci de cussa piciochedda s’at amostau sa tristura chi dd’at fatu cussa manera maleducada. E custus esemprus funt sceti tres de totus cussus chi eus biu de giòvunus chi faint beni su doveri insoru e chi ponint impìnniu in su chi faint.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.