- Dettagli
- Domenica, 02 Giugno 2024 11:04
- Scritto da Redazione
Pula. Atòbiu regionali de is fillus spiritualis sardus de Santu Piu de Pietrelcina
In su cunventu de su para Nazarenu, me in Is molas de Pula, si funt atobiaus is fillus spiritualis sardus de Santu Piu de Pietrelcina. Ddoi fiant 620 personis de assumancu cincuanta logus diferentis de totu s’Ìsula. Ddis narant is Cambaradas de Pregadoria, chi no funt sceti una cambarada de cristianus chi si ponint a fai oratzionis, ma sighint s’esempru de sa spiritualidadi de Para Piu, comenti ddi narant ancoras cussus chi dd’ant connotu innantis de ddu santificai.
Su para de is stìmmatas, su santu de is cunfessionis, s’òmini chi pregàt dii e noti, su fillu de santu Franciscu chi nc’est arrennèsciu a pesai unu spidali in Santu Giuanni de Fògia po is malàdius de dònnia logu. Comenti est nodiu, genti meda de Itàlia e de su mundu intreu at tentu sa sorti manna de andai a su cunventu innui biviat su para e de ddu connosci. Non funt pagus is chi ant cunfessau is pecaus e forsis de prus cussus chi issu nci at stesiau de su cunfessionali.
Fiat sa manera sua, mancai tropu forti chi pariat arrenegau, po fai a cumprendi mellus su bisòngiu de cambiai vida, de lassai cussa vida mala e trista, po sighiri cun fortza a Gesùs. Apustis de sa morti sua, in su 1958, sa genti chi est aproilada a cussu logu est crèscia meda e ancoras oindii no funt pagus cussus chi dònnia annu andant a bivi calincuna dii de spiritualidadi.
E chini no podit abarrai ingunis a totu annu? Is Cambaradas de Pregadoria serbint a cussu: a pregai po is bisòngius de sa Crèsia, a acumpangiai sa missioni de is paras, a pigai cun seriedadi su Vangelu. In Pula, s’atòbiu regionali dd’at pensau e cuncordau para Enricu Mascia, capellanu de su spidali Santu Martinu in Aristanis e responsàbili po sa Sardìnnia de cussa realidadi.
Su tema chi est acumpangendi a is fillus spiritualis de totu s’Itàlia ocannu est sa ligidura de is librus santus – comenti iat scritu su para santu a sa filla spirituali Rafaelina Cerase – e pruschetotu de sa Bìbbia. No pagas bortas s’arriscu est cussu de fai arrosàrius, ligi giaculatòrias, ascurtai fueddus bellus e santus, ma de no connosci agiumai nudda sa Bìbbia, chi est Fueddu de Deus.
E ocannu, cun sabidoria manna, su responsàbili natzionali, para Lucianu Loti, est girendi s’Itàlia – ddoi fiat finas in Pula e at a girai sa Sardìnnia in custas diis – po arrepiti a totus custu impinnu. Sena de ascurtai e pregai su Fueddu de Deus, totu s’àteru podit acontessi comenti de pagu valori.
E totu cussa genti chi est andada a Pula at intèndiu arraxonadas in contu de custu tema, at pigau cuscièntzia de cantu siat de importu a tenni sa Bìbbia comenti a fundamentu, at arremonau chi pruschetotu su fundadori de cussu assòtziu, para Piu etotu, me in is billetus chi mandàt, teniat su Fueddu de Deus comenti a ghia.
Duncas, apustis de su momentu de formatzioni e de sa Missa, cussu logu bellu, chi est su cunventu de is paras de Pula, est stètiu prenu de genti chi at postu impari dònnia màndigu de Sardìnnia po unu pràngiu bellu de amistadi. In su meigama ant pregau s’arrosàriu e ant fatu una bella prufessoni in s’ortu de su cunventu.
Me in Aristanis e in sa diòtzesi nostra ddoi est custa bella realidadi, chi tenit sa punna de pregai, de connosci sa vida e is scritus de su para santu, ma pruschetotu de ligi e connosci sa Bìbbia, cun atentu particulari a su Vangelu.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.