- Dettagli
- Domenica, 08 Settembre 2024 10:37
- Scritto da Redazione
Pensamentus e ideas a s’acabu de un’àteru istadiali, abetendi su benidori
Candu arribàt su mesi de cabudanni, is turistas fiant torrendi a domu insoru e nosu sardus fiaus serrendi is domus e torrendi a betiri totu a bidda. Mi-ndi arregordu de su babbu e sa mamma de babbu chi cumentzànt de su binticincu de austu a betiri a Santeru de Putzu Idu mantalafus, cabidalis, pingiadas e tianus, foràstius abarraus e s’àxina chi fiat crèscia in su stauleddu de cortilla. Cun sa motocarrotzella dònnia mangianu unu biàgiu, finas a candu sa domu de mari no abarràt bùida.
Ma cussus fiant àterus tempus. Oi no est prus diaci. Oi in su mesi de cabudanni is turistas ddoi funt ancoras e, a chini donat a pesoni sa domu, ddi tocat a abarrai a servìtziu de cussus chi sceberant custu mesi po pagai unu pagheddu prus pagu, po no tenni tropu genti acostau a su paracu mannu in sa praja e po si gosai su soli impari a unu pagheddu de friscu in prus.
E chi proit? Andat beni etotu: si podint fai passilladas, bìsitas a museus o a monumentus, si fait unu giru in Casteddu o in S’Alighera, si càstiant arruinas archeològicas e nuraxis. Duncas, totu bellu po chini arribat e po chini abarrat? Naraus chi tocat ancoras a fai meda po stai mellus in logus meda de sa provìntzia de Aristanis. No tèngiu idea de mudai sa terra nostra in d-una discoteca a totu dii e a totu noti.
Chini bolit, si podit e depit spassiai, ma sena de strobai a totus cun sa mùsica finas a is cincu de mangianeddu. Ma no si podit mancu pregontai a chini benit de andai a si corcai a is dexi. No tèngiu mancu idea de fai cresci tropu cussus stabilimentus chi tenint in s’arena paracus e mesixeddas, boghendi-ndi a chini arribat a mari su logu de si sterri. No tèngiu mancu puru idea chi sa costa sia prena de domus, albergus, piscinas po arricus o struturas po chini tenit unu muntoni de dinai.
In prus, no seu imbideau a imparai a sìndigus e amministradoris s’arti insoru, cun totus is arrègulas e leis chi depint sighiri innantis de fai una cosa. Ma mi parit malu a crei chi no si potzant fai una parigheddas de cosas chi iant podi fai stai mellus a totus. Innantis de totu, chi mi pedis cuatru, ses, otu èurus de parchègiu po sa màchina in d-una dii, no nci arrennescis a ponni unu grifoneddu de àcua po mi podi sciacuai assumancus is peis?
Innui ddoi est sa cunduta, cantu nci bolit a ponni calincunu grifoneddu – lassaus a perdi is dòcias – cun d-una griliedda de ferru? Chi a is chi bivint in d-unu logu de mari ddi pregontas su dinai de s’Imu, e no funt pagu francus, no si podint fai puliri in maju is crasuras de is arrugas printzipalis o is tretus innui crescit s’erba acanta de mari?
Chi mi scriis chi no si podit pipai in sa praja o no si podint betiri canis o no si depint lassai arrefudus, chini depit fai arrespetai cussa arrègula? Ddu depu nai deu a su bixinu o fait a agatai a voluntàrius chi girant e sinnalant a is vìgilis, chi calincunu abètiat?
Comenti est possìbili chi medas de nosu s’arregordant chi su mangianu – in totu is prajas prus mannas de sa provìntia nosta – passànt tratoris po puliri e murigai s’arena cun traballantis chi nd’arregolliant cussu chi ndi bessiat a pillu e oi custu no si fait mancu su mangianu de mesu austu, a pustis chi tròporas de piciocheddus ant fatu festa totu sa noti innantis? No est po si chesciai, ma nd’iaus a bolli cumprendi is arrexionis.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.