- Dettagli
- Domenica, 15 Settembre 2024 10:34
- Scritto da Redazione
Candu andaus a unu logu po si curai o po acumpangiai a parentis o a amigus
Candu unu s’agatat in d-unu logu diferenti de cussu chi connoscit de prus o chi no est avesu a abitai, parit ca no nci-ddi bessint mancu is fueddus po arrespundi a cussu chi dd’acontessit. In prus, segundu su logu chi ses, ti parit puru de no podi nai cussu chi in àteru logu ti-nci fiat bessiu sena de pensai.
Est cussu chi a medas acontessit in d-unu spidali: e candu ses parenti de chini est arricoverau o candu ses tui etotu a depi essi curau. S’agitòriu po is doloris o po cussu chi ses passendi parint de no ti fai a cumprendi massimamenti su chi ti narant; e dònnia cosa ti parit de doveri.
Ma candu ti firmas pagu pagu – mancai a su noti – e ddoi torras a pensai, ti pregontas: Ma ti parit brulla bella chi mi depu fai pigai a tzerrius de custa genti? Ma cosa ddis depu a custus chi traballant innoi? E pensendi-pensendi ti benit a conca de nai ca s’incràs no at a essi comenti a sa dii innantis.
Duncas, cumentzaus su contu de unu mundu chi parit imbentau. Innantis de totu, candu unu arribat a su spidali, no est sèmpiri chi sciit a innui intrai o andai. Chi tenis abisòngiu de agiudu e preguntas comenti podi arribai a su logu giustu, parit de ai fatu un’arrevesa a calincunu: E candu mai no sciis ca bastat a caminai deretus, furriai a manca e pigai su de duus ascensoris e cracai -2 po arribai a sa genna chi ti fait intrai a un’aposentu chi tenit un’intrada sena de billetus po su repartu?
Arribaus a su repartu, tocat a cumprendi ita fai e comenti sighiri. Ddoi at una genna serrada e unu sonàgiu in foras. Ita pensat su cristianu? At a tocai a sonai po fai a sciri ca seus arribaus. Duncas, sonas una borta e abetas, ma no bessit nemus. Abetas cincu minutus e torras a sonai, poita no sciis chi dd’ant a ai intèndiu. Ma nimancu a sa segunda ndi bessit nemus.
Duncas, pigas su paperi chi t’ant donau po s’arricoveru e tzèrrias cun su telèfonu. Pronto? E tui: Seu su tali. Seus in foras de sa genna po intrai. Ti serrat su telèfonu e ndi bessit de sa genna: E ita est custa cosa de strobai cun su telèfonu? No fiat bastau a pichiai sa genna cun su sonàgiu? E tui: Dd’apu sonau duas bortas, ma no est bessiu nemus e apu pensau de telefonai. E cudda, basciotedda e totu nèrbius: Gei no seus mancu sena de fai nudda. Imparit a abetai.
Tui intras comenti a unu cani scutu a fusti e ti setzis in sa cadira. Abarra atentu: no ti depis acostai a su letu, no podis caminai in su passaritzu, no depis aberri is fentanas, no depis sonai su campaneddu. Arribat s’infermiera e ti narat: Su pipiu no podit papai finas a custu merii. A su noti podit papai gelau, ma si ddu depeis comprai. Po sa mamma chi dd’acumpangiat teneus unu cantu de pani e de ingaùngiu e un’ampudda de àcua. Chi boleis àteru, ddu depeis comporai.
Insaras, o su babbu o sa mamma de su pipiu bessint de su repartu e cussa infermiera etotu narat: Mi dispraxit meda, ma innoi no seus in d-unu logu de spàssiu: non si podit intrai e bessiri a disìgiu. E cudda o cuddu: Ma chi depu comporai su gelau po su pipiu? E s’infermiera: S’arrègula est arrègula. E duncas, tocat a bessiri sena de nai nudda. A su noti: No si corchit in su letu acanta de su pipiu! E cudda: E chi mi pigat sonnu, no mi potzu pasiai in su letu? E cudda: Nossi, desinuncas cras si tocat a ddi cambiai is lentzolus! Pòberu mundu!
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.