- Dettagli
- Domenica, 20 Ottobre 2024 10:21
- Scritto da Redazione
Zeddiani. Ocannu puru sa bidda at arregordau a s’artista tzia Veronica Serra
Candu una bidda si bestit a festa est una cosa bella. Ma est ancoras prus bellu chi s’afestat una personi de sa bidda etotu. E, a bortas, seus fengiosus de is cosas bellas fatas de unu de sa pròpia bidda nosta e no ddu carculaus nimancu. Ma funt sèmpiri de prus is logus chi avalorant is prendas culturalis, de arti e de literadura chi ant biu genti de su logu a essi maistus e maistas.
Liliana Canu in Uliana, Maria Lai in Ulassa, Pinùciu Sciola in Santu Sparau e medas medas diaici. Finas acanta de nosu de annus meda a oi s’afestat a una fèmina chi est faendi sa stòria de sa bidda, poita cun s’òpera sua sighit a fai arribai trupas de genti po biri is fainas chi at fatu po una vida intrea: tzia Verònica de Zeddiani. Su cincu e su ses de ladàmini a Zeddiani ddoi at arribau una cambarada manna de genti po biri cun prexu e cu praxeri is cuadrus de pintura de tzia Verònica Serra.
Ocannu passau fiant centu annus de sa nàscida de tzia Verònica e dd’ant afestada finas cun d-unu bìdeu chi si podit ancora agatai in s’arretza e chi contat chini fiat e ita at fatu in vida sua. A issa ddi praxiat a pintai e ddu faiat asusu de dònnia cosa: cartoni, linnixedda de pagu contu, telas. Sa Galleria de arti de Aristanis La colonna de Camarda benit a sciri de custa fèmina chi pintat e ddu narat a duus de is pintoris de Sardigna pus nodius e cun pistocu in bèrtula: Foiso Fois e Pinùciu Sciola.
Custus andant a dda connosci e abarrant prexaus meda de sa pintura chi fait Verònica Serra. Difatis, innantis de cussu atòbiu sa firma asusu de is cuadrus fiat Verònica, ma tocat a cresci e duncas cumentzat a scriri tzia Verònica. Ma est bellu meda a biri is pinturas de cussa fèmina chi, segundu is fueddus de chini dd’at connota, fiat simpri e no ddi praxiat meda a essi bantada.
Chini dda bolit connosci mellus podit biri e ascurtai su chi ddoi est in sa pàgina ziaveronica.it. Ma su chi si bollu nai est chi est bellu meda a girai in Zeddiani is diis de sa festa: s’agatant cuadrus de s’artista in dònnia logu. No bastat a nd’agatai sceti in logus serraus e stabilius de chini at cuncordau sa festa, ma dònnia domu ddas at amostadas in foras de sa genna.
Eus pigau unu trenixeddu chi at fatu s’ingìriu de sa bidda e si podiant biri cuadrus in arrugas, faciadas de domu e in pratzixeddas. Zeddiani pintàt e coloràt de tzia Verònica po una dii. Sa cosa ancora prus bella est chi in d-una pariga de logus de sa bidda, su Comunu e sa Pro loco in custus annus nd’ant fatu pesai una bellesa de murales e de fainas chi in dònnia dii de s’annu faint arregordai a tzia Verònica.
Candu s’arribat de sa prima bessida de sa Carlu Felici passendi de innui fiat sa cunserviera, s’agat unu murale chi balit a ddu biri. Un’òpera manna e bella chi ponit in mesu a tzia Verònica e a ingìriu is fainas suas. Cussa de Zeddiani est una faina de memòria, de avaloramentu de s’arti, de stima po una filla de cussa bidda. A ndi connosci medas de custas fainas cun s’òpera de totus e faendi traballai a totus.
Chini fait garnàcia, chini arti, chini cosa de papai e chini tessit e produsit àteras cosas. Gràtzias a tzia Verònica e de prus a chini dònnia annu sighit a fai cresci custas duas diis.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.