- Dettagli
- Domenica, 01 Dicembre 2024 09:49
- Scritto da Redazione
Atzara. Logu nodiu po sa bellesa de is bìngias pintadas de is pintoris prus mannus
In custu tempus de atòngiu funt medas cussus chi àrtziant a Mandolisai e a Barbàgia po bisitai is biddas in festa e po comporai is prendas chi si produsint in dònnia logu. Candu una de cussas biddas s’allichidit po acasagiai sa genti chi depit arribai, si movint a trupas vìgilis, barracellus, genti de bonu coru, àterus operadoris chi si ponint a ghiai tràficu, a fai firmai màchinas in su logu giustu, chi faint ponni is corrieras in òrdini e agiudant a is chi arribant a bidda a agatai sa carrela giusta po essi luegus acanta de sa festa.
Ma arribaus a sa pratza, ita agatant? Ita podint biri e bisitai? Faeus s’esempru de Atzara, in provìntzia de Nùgoro, in diòtzesi de Aristanis, in sa regioni de su Madrolisai. S’acasàgiu bellu meda cun genti chi in dònnia intrada de sa bidda agiudàt a agatai logu po sa màchina e chi donàt is inditus po no fai tretu meda a pei.
Sa bidda fiat comenti a unu logu de abis: totus faendi, movendi e prontus a serbiri a papai, a fai tastai, a amostai is prendas bellas. Nuxi (còcoro, comenti ddi narant in Atzara) e nuxedda, turroni, meli, parafritus, sebadas, mèndula. Ma su prus chi s’est biu e bèndiu in Atzara est stètiu su binu.
Custa bidda est nodia in dònnia logu po sa bellesa de su binu, po s’antigòriu de is domus chi si biint girendi sa bidda, po su bonucoru de is chi ddoi bivint. A dònnia tretu unu magasinu, calincunu chi donàt a tastai a bufai, sa possibilidadi de cumprendi chi is produsidoris de binu funt medas e bravus.
In su bintitrès e binticuatru de santu Miali – comenti eus biu scritu in d-una filera de cuadritus in sa domu de donna Anna Maria Serra, a palas de sa crèsia de santu Antiogu – s’est pòtziu biri unu muntoni mannu de genti cun d-una bertuledda apicada a tzugu e una tassa aintru: si podiat comporai sa tassa e cuatru tastaduras a doxi èurus. No fiant pagus cussus chi teniant cussa bertuledda. Su dispraxeri mannu est chi si podiat bisitai sceti una domu de cussas de is meris antigus, innui si podit biri totu sa ferramenta bècia, sa manera de bivi de cincuanta e centu annus a oi, telàrgius, forrus, prentzas e prendas de àterus tempus.
Cun totu is domus bellas chi ddoi funt in Atzara, si parit tropu pagu a nd’aberri una sceti. Sa genti chi arribat de is biddas ndi podit biri finas acanta de domu; ma chini arribat de tzitadi s’abetat de torrai a biri unu carru, una pàlia, unu treutzu, unu molineddu po cafei, unu cumò, una mesa po fai pani. In sa domu de donna Annamaria Serra si-ndi funt pòtzias biri meda de custas cosas, ma est stètia s’ùnica.
S’annu chi benit, iat a essi bellu a ndi fai aberri medas de prus. Sa genti no mancat! Finas su Museu de Arti moderna at tentu bisitas meda e is chi ant fatu sa bisita ant pòtziu connosci su mundu de Atzara antiga. Cantu funt is pintoris chi beniant a Atzara in atòngiu po pintai is bìngas grogas e arrùbias?
S’Assòtziu de su Sacru Coru chi fait servìtziu de cantu e de cultura at permìtiu a is bisitadoris de torrai a biri comenti si traballàt su pani e comenti si pintàt cun ferrus e gorteddus. Una faina bella chi at permìtiu a genti meda de arremonai is tempus antigus e de torrai a tenni disìgiu de pani bellu fatu in domu. Poita sena de pani, su binu no si podit bufai: imbriagat.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.