- Dettagli
- Domenica, 19 Gennaio 2025 11:48
- Scritto da Redazione
Su merii de sa Pasca de is Tres Reis (su ses de gennàrgiu), in sa caserma de is Vìgilis de su Fogu de Aristanis ddoi ant fatu una festa manna po pipius e po mannus.
Est de una pariga de annus bellus chi, a mangianu, is pompieris ndi faint calai a unu de issus etotu bestiu a Befana de sa turri de Marianu, in pratza de Porta manna, in Aristanis. Unu momentu bellu e de coru, chi si bivit agiumai in dònnia pratza de is tzitadis de Itàlia. Una menara no sceti de fai su chi is cristianus normalis no depint fai po seguresa, a si-ndi calai de logus artus e perigulosus, ma po ammostai a totus s’abilesa de chini dònnia dii arriscat sa vida po agiudai sa genti.
A bortas seus avesus a pensai a is pompieris sceti candu si biit fogu in su sartu, in s’istadiali, o in cali si siat àtera ocasioni, in logu de fabbricu o peri is bias. De seguru, cussa est una de is fainas chi faint de prus, ma ddoi funt medas cosas chi issus depint fai in totu s’annu. Balit a nd’arregordai assumancus calincuna.
Candu accontessit calincunu incidenti de màchinas e unu de is chi s’agatat aintru est impresonau o impeigau de lamieras o de àteru, funt is pompieris chi interbenint po ndi-ddu scabulli e po ddu ponni me in is manus de dotoris e infermieris. Chi calincunu abarrat incriau in domu e is crais no arrennescint a scriai sa genna, funt issus chi currint e chi sarvant a su chi est serrau aintru. Candu, in tempus de frius, proit meda e arrugas e domus abbarrant asuta de s’àcua, a issus tocat a tzerriai po ponni in seguresa a sa genti e finas is animalis de domu.
Finas un’àtera cosa faint: candu is ghespis faint su niu in bixianu de domus o acanta de innui ddoi bivit genti, tocat a ddus tzerriai po transiri su niu e is ghespis. Ma medas e medas cosas in prus faint e nosu ddis torraus gràtzias po totu su chi bieus e po su chi faint sena de si fai pubricidadi.
Torrendi a su ses de gennàrgiu, fiant medas is personis chi si funt acostadas a caserma po biri sa calada de sa Befana: unu muntoni mannu de pipius cun babbus e mammas. Una surra de caramellas, ciuculatis e durcis funt arribaus a conca de is piciocheddus, chi, prexaus che Pasca, si-ddoi funt batallaus po ponni in buciaca totu sa gràtzia de Deus chi podiant.
In prus, po totu su meigama, finas a su scurigadòrgiu, totus ant pòtziu bufai e papai, sena de ponni unu soddu, me in is mesas apariciadas a festa. Una cosa bella meda chi arregordat su beni chi is pompieris faint dònnia dii po sa genti e po sa sotziedadi. Gràtzias a totus e, a manera particulari, a sa scuadra de pompieris chi at pesau custa festa e custu servìtziu po mannus e pipius.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.