- Dettagli
- Domenica, 23 Febbraio 2025 11:08
- Scritto da Redazione
Àfrica. In su Congo est pesendi-sì una gherra manna po otenni prus arrichesas
In su nùmeru de cida passada de Famìllia Cristiana est bessiu un’artìculu bellu – chi fait timi po su chi ddoi at scritu – de Andrea Riccardi, su chi at pesau sa Comunidadi de Sant’Egìdiu. De stòricu e capatzu de ligi su chi acontessit in su mundu, at bòfiu scriri de Goma, tzitadi de su Congo, in Àfrica.
No funt totus is giornalis chi fueddant de s’Àfrica e chi si contant su chi est capitendi in cussa parti de su mundu. A bortas parit ca su chi sutzedit ingunis no si tocat meda e no si ddu contant. Ma nosu scieus cantu sa Diòtzesi nosta est acapiada a su Congo, po sa presèntzia de is fillas de Santu Giusepi de Geroni e de medas mòngias de su Congo chi ant studiau o ant bìviu e bivint innoi.
Duncas seus acanta a totu is chi sunfrint po cussa gherra e a is chi prangint a parentis e amigus. Agiudada de su Ruanda e de calincunu àteru governu, una trupa manna de sordaus est intrada a su Congo e at cumentzau su caminu – forsis – po arribai a sa capitali, Kinshasa, po nci bogai su Guvernu. Scriit Riccardi: In su 1997 giai Laurent Désiré Kabila iat fatu su propiu tretu de strada cun s’esèrcitu e cun sordaus, po ndi sciusciai su Guvernu de Mobutu. In Goma s’esèrcitu de su Guvernu no at tentu sa fortza de cumbati; duncas, no eus a biri un’àtera gherra mala e longa, innui est sa genti a sunfriri e a si-nci depi fuiri?
Sa trupa armada, M23 (Movimentu de su bintitres de martzu), est circhendi de fai asseliai sa genti, chi est timendi e chi s’est ghetada totu a tzitadi, lassendi campus e domus in campagna, po tenni prus seguresa. Ma s’òpera de M23, scriit Riccardi, no est atesu de su chi ant fatu is trupas de sa Jihad in su Sahara o in su Sael, o de àteras trupas de arrebellus.
E no amancant is trupas russas de sa Wagner, chi eus imparau a connosci assumancus comenti a nòmini. Duncas, in Congo ddoi funt doxi milionis de personis sena de domu e sena de logu de pàsiu. In totu s’Àfrica funt corantacincu millionis, su 3 % de totu is africanus. No est pagu! Ddoi funt finas a 680.000 rifugiaus e a custus si-ndi aciungint àterus 180.000 de is ùrtimas gherras.
In prus tocat a ponni in contu chi is Guvernus o is chi traballant po su Stadu medas bortas bendint totu e a totus po su dinai. Sa corrutzioni tocat a totus. In su 2007 pròpiu in Goma ant mortu a unu giòvanu de Sant’Egidiu chi faiiat controllus in sa dogana a làcana cun su Ruanda. Iant provau a ddi donai dinai po fai passai unu càrrigu de arrosu malu chi depiat passai ingunis.
Cussu no at pigau su dinai e no at fatu passai su càrrigu. Dd’ant bociu po fai a cumprendi a totus chi s’arrègula depit essi ancora custa: no as a essi tui a cambiai sa sotziedadi e su Congo. E, invècias, cussu piciocu iat cumentzau unu caminu po sa comunidadi cristiana e donau unu bellu esempru.
Su Paba at nau de ddu beatificai, ma imoi cu sa gherra cussu momentu si-nc’est stesiau. Ita ant a fai is stadus otzidentalis? Funt medas is stadus chi tenint parti e interessus po cussa parti de su mundu: sa Tzina, sa Turchia, sa Rùssia, s’Ìndia, s’Aràbia, àterus stadus de is àrabus e meda stadus de s’Europa. No eus a scaresci de nai chi in su Congo tenint arrichesas mannas e su coltan in misura de ndi tenni s’80% de su chi s’agatat in totu su mundu.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.