- Dettagli
- Domenica, 13 Aprile 2025 09:45
- Scritto da Redazione
De su telèfunu si podint otenni scàtulas de màndigus a prètzius prus bàscius
Me in is diis passadas m’est acontèssiu de chistionai cun d-una fèmina in d-una de cuddas butegas mannas. Fiaus, totus e is duus, sceberendi fruta e nd’eus agatau una screfada e punta. Dd’eus posta a parti e eus sighiu a sceberai sa nosta. Arribau su piciocu de su repartu, si domandat scusa e si narat ca fiat acanta de fai su traballu de sceberu de sa fruta bella e de sa mala. E cudda fèmina: Giai giai ddi depu pregontai chi mi-ndi giait po is puddas.
E cuddu piciocu: Chi bolit, ddi potzu donai birdura puru. Ddi pòngiu in d-unu sachiteddu is follas de arrefudu o su chi no podeus bendi e cun pagu centèsimus si-nci-ddu portat a domu. E cudda fèmina, totu prexada: Deus si ddu paghit! Mi fait una gràtzia manna. Ma no est chi calincunu ddu batallat po su chi est fadendi po mei?
E cuddu piciocu: Nossi. Po nosu est mellus a nci-dda fai bessiri de innoi sa cosa, mancai acalamada, chi no a nci-dda fuliai a s’àliga. Duncas, seu abarrau castiendi e cussa fèmina cun prus pagu de un’èuru nci at pigau a domu duus sachiteddus de cosa po is puddas. Apu pregontau a cussu piciocu apustis comenti mai custu no si podiat fai puru po is cristianus.
Mancai a acabu de merii o a acabu de cida, donai a prètziu bàsciu màndigus chi funt acanta de scadiri opuru chi s’incràs si-nci depint scavulai: pastas de crema, petza coxinada, pasta o arrosu… Ddoi funt giai de annus una muntoni de app de scarrigai in su telefoneddu, innui si podit biri cali butegas tenint màndigus de donai, si podit scriri e pagai pagu soddus, a segunda de cussu chi ddoi est in d-una Magic box (una scàtula de spantu).
No si podit sceberai ita ddoi at aintru e dònnia butegheri at a circai de ddoi ponni cosas de prus e pagu importu. In provìntzia de Aristanis, ma finas in totus cussas de sa Sardigna, s’app chi est prus spartzinada est Too good to go, chi bolit nai tropu bonu po andai, tropu bonu po scavulai.
Bastat a ndi scarrigai cussa app in su telèfunu e a circai cali funt is butegas in su bixinau de domu nosta o de su traballu e biri candu ponint s’avisu de cussa scàtula. Su chi ddoi est aintru no s’at a podi praxi totu, ma dii cun dii eus a cumprendi mellus cali est sa dii de sa cida chi si cumbenit de prus o cali est sa butega chi est mellus a sighiri.
In prus, a chini praxit a si spantai est oportunidadi manna, poita no si sciit mai ita ddoi at aintru de sa scàtula e permitit de mudai is abitùnidis de papai. Ddoi est puru un’àtera app chi donat màndigus chi tenint scadèntzia longa, ma chi funt de fai bessiri luegus de sa butega: Surprise bag (sa bussa spantosa).
No est ancora spartzinada in totu is provìntizas, ma podit essi ocasioni finas po is butegheris po tenni clientis nous. Custas e àteras app agiudant a no sperditziai sa cosa de papai e su chi si produsit. In prus permitit a sa genti de spendi unu pagheddu prus pagu, oi chi dònnia cosa est crescendi de prètziu agiumai dònnia cida.
In prus, ancoras, no andat a is muntonàrgius de arrefudus diferentis chi papant unu muntoni mannu de energia elètrica e costant una barca de dinai. Si calincunu bolit sciri de prus in contu de s’argumentu de su sperdìtziu alimentari, podit circai novas e consillus in www.sprecozero.it
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di MAC
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.