- Dettagli
- Domenica, 18 Gennaio 2026 10:51
- Scritto da Redazione
Scola e cultura. Est morta una fèmina de importu mannu po scientis e professoris
A s’acabbu de un’annu o a su cumentzu de su nou, s’acostumat a arregordai a is personis chi ant tentu ruolu in sa vida de su Stadu o de sa sotziedadi. Biendi calendàrius o cussus resumus chi ponint impari a sa genti de importu, apu biu chi tra is medas una est mancada in dònnia logu.
Est una personi de importu mannu no sceti po una tzitadi o unu Stadu, ma po is giòvanus de totu s’Europa. Comenti at bìviu sena de fai nisciuna palleria, diaici est morta e, a dolu mannu, parit scarèscia de totus: Sofia Corradi. Calincunu de is ligidoris at a essi pensendi: E chini benit a essi? No dd’apu mai intèndia nomenai.
E chi est diaci, eus intzertau: a custa fèmina manna dda connoscint in pagus, mancai essit fatu una tra is fainas prus mannas po su mundu de sa cultura. Po si fai cumprendi luegus dda tzerriànt mamma Erasmus: poita est sa chi at imbentau cussa manera po is scientis de andai in d-una scola de un’àteru Stadu po fai unu tretu de studiu imparendi sa lìngua. Nàscia in su 1935 e morta, a norantunu annus, in su mesi de ladàmini de s’annu passau, at batallau po binti annus innantis de cumentzai a biri laureaus movendi po studiai in totu su mundu.
In su 1957 fiat studiendi Leis in s’universidadi de Roma e iat connotu a unu piciocu americanu e dd’iat stiamau meda finas a decidi de ddu sighiri in Amèrica po sighiri is stùdius in d-una universidadi de ingunis. Torrada cun esàminis fatus, su Stadu italianu no si-ddus iat arreconnotus e ddi fiat tocau a ddus torrai a fai.
De insaras, iat pigau sa detèrmina chi non si fiat firmada, cun sa punna de no fai torrai a bivi a nemus su chi iat connotu issa. In su 1987 s’Unioni Europea iat firmau cussu chi po totus est diventau su Progetu Erasmus, fadendi-dda sa mamma de cincu millionis de giòvunus in totu is Stadus chi faint parti de s’Unioni Europea.
Duncas, de sa stòria acabbada mali de una giòvuna picioca est nàscia una faina de resèssida po millionis e millionis de piciocus. In prus, imoi s’abetat chi s’Europa arrìciat e aprovit su progetu de Sofia Corradi Erasmus+ chi tenit sa punna de amanniai cussa faina de scàmbiu finas po professoris, po scolas, po chini fait tirocìniu e po volontàrius.
Professora Corradi in su 2024 iat nau chi in custu tempus innui in Europa sa mùsica est cussa de is diferèntzias, de su natzionalismu, de biri is àterus comenti a stràngius strobadoris, su progetu Erasmus podit essi sèmpiri de prus sa manera po si fai intendi fradis e sorris, po si fai cumprendi chi sceti impari si podit cresci e amparai sa paxi. Studiai in d-un’àteru Stadu est unu caminu de vida e un’esperièntzia de comunidadi chi crescit e amellorat sa personi.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' questo il momento giusto per abbonarsi a L'ARBORENSE
Clicca qui per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.