- Dettagli
- Domenica, 14 Gennaio 2024 12:27
- Scritto da Redazione
Is nùmerus no funt sa prima cosa de importu po una fidi, ma mellus a ddus sciri
A bortas si narat chi is giornalis si faint cun is giornalis etotu. Meda e no pagu si scriint o si narant in sa ràdiu novas lìgias o intèndias de àterus giornalistas. Nosu puru eus a fai aici: no po s’arrangiai a preni su spàtziu chi si giaint in custa pàgina, ma po agiudai a chini ligit a sciri cosas chi arribant de su mundu e de sa Crèsia de su mundu.
Oi provaus a si contai una pariga de novas chi pigaus de sa rivista de is Paolinus chi ddi narant Jesus e chi dònnia mesi sterrit unu muntoni mannu de chistionis. In s’ùrtimu nùmeru, de su mesi de Paschixedda, ant publicau un’artìculu mannu in contu de is vocatzionis e de is seminàrius italianus. No si chistionat sceti de is nùmerus chi si impiticant sèmpiri de prus, ma finsas de s’edadi e is traballus fatus de cussus chi arribant a seminàriu.
Insaras, sa prima cosa est su nùmeru dei is predixeddus chi s’aprontant a cantai missa. De su 2009 a su 2019 su nùmeru de is predixeddus est calau de su 28 % in is seminàrius de totu s’Itàlia. In su seminàriu regionali de Sardigna in is ùrtimus annus de su Duamilla fiant unas sessantina is piciocus studiendi a predi; imoi no arribant mancu a trinta.
Est berus, narat su giornalista de Jesus, chi puru sa natalidadi est prus bàscia: in dexi annus est nàsciu su 18 % de mascus in mancu. In prus, si cojant unu nùmeru bàsciu meda de sposus: in su 2012 si contant 122 milla cojas, contras a is 83 milla de su 2021. S’àtera statìstica de importu est s’edadi de is predixeddus: non funt prus piciocheddus de is mèdias o de is scolas superioris, ma tenint in sa mèdia natzionali pagu prus de 28 annus.
Custu bolit nai chi nci funt giòvunus apenas bessius de is scolas e òminis giai mannus e bonus. Custu si cumprendit mellus candu s’avertit chi unu seminarista dònnia dexi tenit prus de 36 annus. Est giustu a mentuai puru chi su 45 % at giai trastigiau in s’universidadi e su 43 % at giai fatu calincunu traballu.
No s’intrat a Seminàriu giai predis, ma po cumprendi mellus chi cussa bia est sa giusta. Su teòlogu Armando Matteo at nau puru chi is piciocus e piciocas chi ddis narant Millennials (nàscius apustis de s’annu 2000) funt sa prima generatzioni chi no creit. Forsis custu puru no agiudat a si fai predis. In sa diòcesi de Règgio Emìlia ddoi funt 139 diàconus permanentis: su 90 % de cojaus e su 10 % de bagadius.
Invècias, de predis ndi-ddoi funt 198 de sa diòcesi etotu e àterus 18 de foras. Faendi una pàriga de contus, in su tempus benidori (5-10 annus) is diàconus ant a essi prus de is predis. Sa diòcesi ndi tenit giai cuìndixi chi ant fatu domanda po incumentzai su camminu e 17 chi si funt aprontendi po s’ordinatzioni.
Infinis, Jesus contat chi in su cantoni de Ginevra, in Svìtzera, de su 2019 a oi ant disamparau sa Crèsia catòlica prus de 30 milla personis a s’annu. Lìgiu aici, fai timmi. Ma candu biis chi in is àterus cantonis – aundi no ddoi est òbrigu de pagai is tassas acapiadas a sa religioni – su nùmeru no est mancu de tenni in contu, cumprendis ita est totu cussa gana de si-ndi fai scancellai de sa Crèsia.
Invècias, in Cile is catòlicus funt calaus de su 70 a su 48 %, mentris is evangèlicus funt crèscius de su 12 a su 17 %. Ma funt sèmpiri de prus cussus chi arrefudant dònnia religioni: de su 14 a su 30 %. Intra de is giòvunus su nùmeru est ancora prus artu: is catòlicus tramudant de su 63 a su 36 % de su 2006 a oi.
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.