- Dettagli
- Domenica, 25 Febbraio 2024 12:04
- Scritto da Redazione
Tecnologia. In su 1974 est nàsciu su còdixi a tiras chi at mudau su mundu interu
Cincuanta annus a oi iant imbentau su còdixi a tiras e cun cussa idea est mudada s’econòmia, su commèrtziu, sa manera de bendi e de comporai. Ajaja mia, sa mamma de babbu, tzia Amèlia, est morta agiumai binti annus e fiat una fèmina de spìritu mannu e de curiosidadi. Nci at passau is ùrtimus annus suus scriendi totu cussu chi iat imparau in vida e copiendi totu su chi agatàt scritu, finsas in su giornali de sa diòtzesi, Vita Nostra.
Teneus unu muntoni mannu de cartolàrius scritus a pinna cun arretzetas, vida de santus, poesias, oratzionis. Seu seguru ca, si iat tentu su tempus, nc’iat a essi arrennèscia puru a scriri cun su telefoneddu. Ma poita si seu narendi de ajaja mia? Poita issa no podiat cumprendi a ita serbiant in d-una butega dexi o finsas prus calidadis de cunserva o de fasolu o de saboni po si sciacuai is manus. Ajaja, e comenti ddu bolis su sali? A imboddicàmini de paperi o in bussa de plàstica? E tzia Amèlia: E poita? Cantu ndi ddoi at?
E deu: Assumancu una dusina de calidadis diferentis! E donniunu tenit su prètziu suu. E issa: Mabagràbiu! E comenti fait sa picioca chi fai su contu a ddus scerai totus?
Issa, chi no iat connotu cussas butegas mannas chi oi nascint in tzitadis e biddas comenti a cardulinu in su mesi de ladàmini, abarràt spantada de sa possibilidadi de podi sceberai unu màndigu de genias e marcas diferentis. Ma totu custu at fatu a ddu fai pròpiu po s’imbenta de su còdixi a tiras.
In su 1974, me in Amèrica, is butegas teniant noimilla calidadis de màndigus; a pustis de essi incingiau su còdixi a tiras, nd’ant pòtziu tenni trintamilla. Innantis su cascieri depiat cracai in sa càscia su prètziu interu e ddu depiat connosci, candu cuddu billeteddu si ndi tiràt; cun cussu còdixi no ddoi est stètiu prus abisòngiu de castiai sa calidadi, de connosci su prètziu, de dd’allistai po sciri cantu ndi ddoi fiat ancora e, duncas, po dd’ordinai torra.
Cun cussu còdixi su cascieri podiat, e podit oi puru, chistionai cun su clienti, pensai a is afàrius suus, no si-nd’incurai de allistai nudda poita ca fait totu su computer. In prus, cun cussu còdixi, non tocat a abetai tropu tempus in sa càscia e oi si podit finsas fai sa spesa sena de preguntai a nemus, poita ca cussu sistema t’agiudat a fai totu a solu.
S’ùnica cosa chi s’intendit est unu stragatzeddu po dònnia còdixi lìgiu. Comenti giai nau, innantis de su 1974 me in is butegas americanas tocàt a abetai meda po si fai fai su contu. Dexi annus innantis de cussa imbenta iant fatu unu cuncursu po sa casciera prus lestra de s’Amèrica: chini binciat podiat andai de badas a is Hawaiis e betiat a domu una scerpa de visoni chi baliat dinai.
Cun su còdixi a tiras no serbiat prus una traballadora lestra de conca o una cun memòria, ma una chi sciessit movi is manus a lestru sena castiai nimancu cussu chi passàt.
E custu at ammanniau sa possibilidadi de comporai cosa meda, de provai saboris nous, e – po is meris – de bendi meda de prus. Totu cussa nova, oi est giai cosa bècia, dda biveus dònnia dii, dònnia ora, dònnia momentu e in cali logu chi siat: in butegas de màndigu, in potecarias, in stangus, in su curreu, in su spidali cun arretzetas e anàlisi. E deu torru a pensai a ajaja mia: ita iat a nai oi chi cun su còdixi Qr podeus fai meda de prus?
Faina fatta cun s'agiudu de sa Regione Sardigna Avisu IMPRENTAS - L.R. 22/2018, art. 22
A cura di Michele Antonio Corona
E' sempre tempo per abbonarsi a L'ARBORENSE
Approfitta delle nostre promozioni.
CLICCA QUI per sapere come fare
Leggi anche
Focus
Confagricoltura: a Cabras confronto sul futuro del comparto
A due settimane dal Referendum sulla Giustizia: alcune considerazioni
Parlare con i propri figli: perché è importante che i genitori lo facciano
La fibromialgia: una malattia sottile oggi meglio identificabile
Le palme. Il loro intreccio, una vera arte. Ne parliamo con Nevina Dore
Lo stretto di Hormuz: uno snodo commerciale tra i più importanti al mondo
San Francesco e il coraggio educativo della pace. La via dell’essenziale oggi
Incontri
Intervista a Irene Giancontieri, attrice nella fiction RAI 'Don Matteo'
Un'ostetrica in Tanzania: l'esperienza di Giorgia Pitzus
Intervista a Suor Gabriella, che a Oristano gestisce da anni la Mensa della Carità
Intervista a Daniela Somaroli, presidente dell'associazione Komunque donne
Intervista a Ilaria Canu, presidente della Pro Loco di Oristano
Account
Privacy
Iscriviti al nostro canale youtube
Guarda i nostri video dalla diocesi
Copyright © 2026 Arborense.it - Editore: Arcidiocesi di Oristano - P.I. 01120320955 - CF: 90000270950 Piazza Duomo 18/a 09170 Oristano. Tel. 0783/769036 - fax 0783/775669. boxlab.it realizzazioni siti web.